މެލޭޝިޔާގައި ހުންނެވުމަށްފަހު، ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ (އަދުރޭ) ދާދި ދެންމެ ރާއްޖެ ވަޑައިގެންފިއެވެ.
އަބްދުއްރަހީމް ރާއްޖެ ވަޑައިގަތީ މިރޭ 22:21 ގައި ބަޓިކް އެއަރލައިނުގެ ފްލައިޓެއްގައެވެ.
އަބްދުއްރަހީމް ރާއްޖެއިން ބޭރުގައި ހުންނަވަނިކޮށް، މިއަދު ހެނދުނު ޓުއަރިޒަމް މިނިސްޓަރގެ މަގާމުން އަބްދުއްރަހީމުގެ ދަރިކަލުން އިބްރާހިމް ފައިސަލް ވަނީ ވަކިކުރައްވާފައެވެ. ރައީސް ޑޮކްޓަރ މުހައްމަދު މުއިއްޒުގެ މި ނިންމެވުމާއި ގުޅިގެން "ދައުރު" ނޫހަށް ދެއްވި ބަސްދީގަތުމެއްގައި އަބްދުއްރަހީމް ވިދާޅުވީ ޓުއަރިޒަމް މިނިސްޓަރގެ މަގާމުން ފައިސަލް ވަކިކުރައްވަންޖެހޭ އެއްވެސް ސަބަބެއް ނެތް ކަމަށެވެ. އަދި އެމަނިކުފާނާއި ރައީސްއާ ދެމެދު، ވެރިކަމަށް ވަޑައިގަތުމުގެ ކުރިން އޮތްފަދަ ގާތްކަމެއް އޮތްނަމަ ފައިސަލް ޓުއަރިޒަމް މިނިސްޓަރ ކަމުން ވަކި ނުކުރެއްވީސް ކަމަށް އަބްދުއްރަހީމް ވިދާޅުވިއެވެ.
