ލާމަރުކަޒީ ނިޒާމު ހަރުދަނާކުރުމަށްޓަކައި ސަރުކާރުން 4 މުހިންމު ސިޔާސަތެއް އެކުލަވާލާފައިވާ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު ހާމަކުރައްވައިފިއެވެ.
މި މަޢުލޫމާތު ވަޒީރު ހިއްސާކުރެއްވީ މިއަދު ހެނދުނު ބޭއްވުނު ޚާއްޞަ ރަސްމިއްޔާތެއްގައެވެ. މި ރަސްމިއްޔާތަކީ ކައުންސިލްތަކަށް ފަޅުރަށްތައް ޙަވާލުކުރުމަށް ފިނޭންސް މިނިސްޓްރީއާއި ސިޓީސް މިނިސްޓްރީ ގުޅިގެން ބޭއްވި ރަސްމިއްޔާތެކެވެ.
ވަޒީރު އާދަމް ޝަރީފު ޢުމަރު ވިދާޅުވި ގޮތުގައި، މި 4 ސިޔާސަތުގެ ތެރޭގައި ހިމެނެނީ ކައުންސިލްތަކުގެ މާލީ ޤާބިލުކަން އިތުރުކުރުމާއި، ރަށްވެހި ޚިދުމަތްތައް ފޯރުކޮށްދިނުމުގައި ކައުންސިލްތަކުގެ ދައުރު ފުޅާކުރުމެވެ. މީގެ އިތުރުން، ކައުންސިލްތަކަކީ ރައްޔިތުންގެ ބައިވެރިވުމާއި މަޝްވަރާގެ މަތިން ހާމަކަން ބޮޑު ގޮތެއްގައި ހިންގާ މުއައްސަސާތަކަކަށް ހެދުމާއި، ކައުންސިލްތަކަށާއި ލޯކަލް ގަވަރމަންޓް އޮތޯރިޓީއަށް ބޭނުންވާ އެހީތެރިކަން ސަރުކާރުގެ ފަރާތުން ފޯރުކޮށްދިނުން ހިމެނެއެވެ.
ރަސްމިއްޔާތުގައި ދެއްކެވި ވާހަކަފުޅުގައި ވަޒީރު ފާހަގަކުރެއްވި ގޮތުގައި، ސިޓީސް މިނިސްޓްރީއަކީ ނަމޫނާ މަސައްކަތްތަކެއް ކުރައްވާ، އަދި ނަމޫނާ ދައްކަވާ މުވައްޒަފުންތަކެއް މަސައްކަތްކުރައްވާ ވުޒާރާއެކެވެ. އަދި ރައްޔިތުންނާއި ކައުންސިލްތަކާ ގުޅިގެން މަސައްކަތްކުރެއްވުމުގައި ވުޒާރާގެ މުވައްޒަފުންނަކީ ވަރަށް ފަރިތަ ބޭފުޅުންކަން ވެސް ފާހަގަކުރެއްވިއެވެ. މި ސަބަބުތަކާ ހުރެ، ލާމަރުކަޒީ ނިޒާމުގެ ތެރެއިން މަސައްކަތްކުރުމަށް ކައުންސިލްތަކާއެކު ވަރަށް ބަދަހި ގުޅުމެއް ވުޒާރާއިން މިހާރު ޤާއިމްކުރެވިފައިވާ ކަމަށް ވަޒީރު ވިދާޅުވިއެވެ.
ކުރީގައި ކައުންސިލްތަކަށް ނުވަތަ އޮފީސްތަކަށް ފަޅުރަށް ހަވާލުކުރުމުގެ ވަކި އުޞޫލެއް ނުވަތަ ނިޒާމެއް ނެތްކަން ފާހަގަކުރެވެއެވެ. ނަމަވެސް، މިހާރު އެފަދަ ނިޒާމެއް ޤާއިމްކޮށް، ކައުންސިލްތަކަށް ފަޅުރަށެއް ލިބުމަކީ މާލީ ގޮތުން ކައުންސިލްތައް ބާރުވެރިކުރުމަށް ރައީސުލްޖުމްހޫރިއްޔާ ގެންގުޅުންވާ ހަރުދަނާ ސިޔާސަތުގެ ތެރޭގައި ހިމެނޭ ކަމެކެވެ.
