އެހެން ގައުމުތަކުން ކަންކުރާގޮތް ނުބަލައި، އެސްޓްރަޒެނެކާގެ ކޮވިޑް-19 ވެކްސިންވެސް ހިމެނޭގޮތުން، ވެކްސިން ޖެހުމާއިގެން ކުރިއަށް ދިއުމަށް ޔޫކޭގެ ކަމާބެހޭ އިދާރާއިން އެގައުމުގެ ރައްޔިތުންނަށް އިލްތިމާސް ކޮށްފިއެވެ.
ޔޫކޭގެ މެޑިސިންސް އެންޑް ހެލްތުކެއަރ ޕްރޮޑަކްޓްސް ރެގިއުލޭޓަރީ އޭޖެންސީން މިކަމަށް އިލްތިމާސްކުރީ، ޑެންމާކާއި އެހެން ބައެއް ގައުމުތަކުން އޮކްސްފޯޑް/އެސްޓްރަޒެނެކާގެ ވެކްސިން ބޭނުންކުރުން ވަގުތީގޮތުން ހުއްޓާލަމުން ދިއުމާ ގުޅިގެންނެވެ.
ޑެންމާކުން ނިންމާފައިވަނީ، އެސްޓްރަޒެނެކާގެ ވެކްސިން ބޭނުންކުރުން ދެ ހަފްތާއަށް ސަސްޕެންޑް ކުރުމަށެވެ. އެއީ، އެގައުމުގައި އެސްޓްރަޒެނެކާގެ ވެކްސިން ދިން ބައެއް މީހުންގެ ލޭގައި ގަނޑުލޭކޮޅުތަކެއް (ބްލަޑް ކްލޮޓް) އުފެދޭކަމަށް ލިބުނު ރިޕޯޓަތަކާ ގުޅިގެންނެވެ.
މީގެއިތުރުން، އެސްޓްރަޒެނެކާގެ ވެކްސިންޖެހި އެކަކު ޑެންމާކުން މަރުވެފައިވެސް ވެއެވެ.
އެސްޓްރަޒެނެކާގެ ވެކްސިން ޖެހުން ނޯވޭއިންވެސް ވަނީ ހުއްޓާލާފައެވެ.
ނޯވޭއިން ވެކްސިން ޖެހުން ހުއްޓާލީވެސް ވެކްސިންޖެހި ބައެއް މީހުންގެ ލޭގައި ގަނޑުލޭކޮޅުތަކެއް އުފެދޭކަމުގެ ރިޕޯޓްތަކެއް ލިބިގެންނެވެ.
މީގެއިތުރުން، އިޓަލީންވަނީ އެސްޓްރަޒެނެކާގެ ވެކްސިންގެ އެއްބެޗް ބޭނުންކުރުން އެއްކޮށް މަނާކޮށްފައެވެ.
އިޓަލީން އެ ފިޔަވަޅު އެޅީ، ވެކްސިން ޖެހި ބައެއް މީހުންނަށް ސީރިއަސް ސައިޑްއިފެކްޓްތަކެއް ދިމާވާން ފެށުމާ ގުޅިގެންނެވެ.
ޔޫކޭގެ މެޑިސިންސް އެންޑް ހެލްތުކެއަރ ޕްރޮޑަކްޓްސް ރެގިއުލޭޓަރީ އޭޖެންސީން ބުނެފައިވަނީ، ޑެންމާކްގައި ވެކްސިން ޖެހި ބައެއް މީހުންގެ ލޭގައި ގަނޑުލޭކޮޅުތައް އުފެދޭން މެދުވެރިވީ ވެކްސިންގެ ސަބަބުންކަން ކަށަވަރު ނުވާ ކަމަށެވެ.
ވެކްސިން ޖެހުން ހުއްޓާލަން ޑެންމާކުން ނިންމި ނިންމުމަކީ ރައްކާތެރިކަމުގެ ގޮތުން އެޅި ފިޔަވަޅެއް ކަމަށްވެސް ބުނެފައި ވެއެވެ.
ޔޫކޭގެ މެޑިސިންސް އެންޑް ހެލްތުކެއަރ ޕްރޮޑަކްޓްސް ރެގިއުލޭޓަރީ އޭޖެންސީގެ ވެކްސިން ސޭފްޓީ ލީޑް، ފިލް ބްރަޔަން ވިދާޅުވީ، ލޭގައި ގަނޑުލޭކޮޅެއް ގުދުރަތީގޮތުންވެސް އުފެދިދާނޭ ކަމަށާއި، އެއީ އާންމުކަމެއް ކަމަށެވެ.
ޔޫކޭއިން މިހާތަނަށް 11 މިލިއަނަށްވުރެ ގިނަ މީހުންނަށް ވެކްސިން ދީފައިވާ ކަމަށާއި، ގުދުރަތީގޮތުން ލޭގައި ގަނޑުލޭކޮޅުތައް އުފެދުމުގެ މައްސަލަތައް ދިމާވާ މިންވަރު އާދައިގެ ދުވަސްތަކަށްވުރެ އިތުރު ނުވާ ކަމަށްވެސް ފިލް ފާހަގަ ކުރެއްވިއެވެ.
ފިލް ބްރަޔަން ވިދާޅުވީ، ގަނޑުލޭކޮޅު އުފެދޭކަމުގެ ރިޕޯޓްތަކުގެ މައްސަލަ ޔޫކޭގެ މެޑިސިންސް އެންޑް ހެލްތުކެއަރ ޕްރޮޑަކްޓްސް ރެގިއުލޭޓަރީ އޭޖެންސީންވެސް ވަރަށް ގާތުން ބަލަމުންދާ ކަމަށާއި، އެހެން ނަމަވެސް، މިއީ ވެކްސިންގެ ސަބަބުން ދިމާވާ ކަމެއްކަމުގެ އެއްވެސް ހެއްކެއް އަދި ލިބިފައި ނެތްކަމަށެވެ.
އެހެންކަމުން، ވެކްސިން ޖަހަން އަންގާ ފަރާތްތަކުން އެސްޓްރަޒެނެކާގެ ވެކްސިނާއި އެހެން ވެކްސިންތައްވެސް ޖަހަމުން ގެންދިއުމަށް ފިލް ބްރަޔަން އިލްތިމާސް ކުރައްވާފައި ވެއެވެ.
އެސްޓްރަޒެނެކާގެ ވެކްސިން ދިން ދެމީހަކަށް ސިއްހީ ސީރިއަސް މައްސަލަތަކެއް ދިމާވެގެން އޮސްޓްރިއާއިން މި ހަފްތާގެ ކުރީކޮޅު ވެކްސިންގެ އެއްބެޗް ޖެހުން ހުއްޓާލިއެވެ.
ނަމަވެސް، ޔޫރަޕިއަން މެޑިސިންސް އޭޖެންސީން ބުނެފައިވަނީ، އޮސްޓްރިއާގެ ދެމީހުން ބަލިވުމާއި އެސްޓްރަޒެނެކާގެ ވެކްސިނާ އެއްވެސް ގުޅުމެއް ހުރިކަމުގެ ހެއްކެއް މިހާތަނަށް ނެތްކަމުގައެވެ.
