ހުޅުމާލޭގައި ފްލެޓް އަޅައި އެތަން ވިއްކުމުގެ ނަމުގައި އޮޅުވާލައިގެން އެތައް ބައެއްގެ އަތުން ބޮޑެތި ޢަދަދުތަކުން ފައިސާ ނެގި މައްސަލާގައި ހޯދުމަށް އިންތަރޕޯލްގެ ނޯޓިސް ނެރެފައިވާ ސީ ލައިފް ގްލޯބަލްގެ މެނޭޖިންގ ޑިރެކްޓަރ އަހްމަދު މޫސާ (އައްމަޓީ) ރާއްޖެ ގެެނެސްފިއެވެ.
އަންމަޓީ ސްރީލަންކާއިން ހައްޔަރުކުރީ ފެބުރުއަރީ 21 ވަނަ ދުވަހުގެ ރެއެވެ. ލަންކާއިން ހައްޔަރުކޮށް އޭނާ ރާއްޖެ ގެނައުން ލަސްވެފައިވަނީ ލަންކާ ފުލުހުން ބަލަމުންދިޔަ މައްސަލަތަކާއި ގުޅިގެންނެވެ.
ލަންކާގައި ބަންދުކޮށްފައިހުރި އައްމަޓީ ރާއްޖެ ގެެނެސްފައިވަނީ ދިވެހި ފުލުހުންގެ ބެލުމުގެ ދަށުން މިއަދު ކަމަށް ފުލުހުން ވަނީ ބުނެފައެވެ. އޭނާ މިހާރު ހުރީ ދިވެހި ފުލުހުންގެ ބެލުމުގެ ދަށުގައެވެ.
އައްމަޓީ ލަންކާއިން ހައްޔަރުކޮށްފައިޥާއިރު، އޭނާ ސްރީ ލަންކާގައި ދިރިއުޅޭކަން އެނގޭކަމާއި، އޭނާއާއި ދިވެހި ސިޔާސީ ބައެއް ފަރާތްތަކާއި މުޢާމަލާތްކުރާކަން މީގެ ކުރިން ހާމަވެފައިވާ މަޢުލޫމާތުތަކުން އެނގެއެވެ.
ސީލައިފުން ހުޅުމާލޭގައި 3000 އެޕާޓްމެންޓު އެޅުމުގެ ބޮޑު މަޝްރޫއެއް އިއުލާނު ކުރީ ސަރުކާރުގެ ދުވަސްވަރުއެވެ. އެކަމާއި ގުޅޭ އެއްބަސްވުމުގައިވެސް ދޮއިކޯށްފައިވާއިރު، އެ މަޝްރޫއުގެ ފުރަތަމަ ފިޔަވަހީގެ އެޕާޓްމެންޓްތައް ގަތުމަށް ބައެއް މީހުންވަނީ ފަންސާސް ހާހަށްވުރެ ގިނަ ފައިސާ ދައްކާފައެވެ. ސީލައިފުން އަޅާދޭނެކަމަށް ބުނި ފްލެޓްތައް އަޅާނުދީ އެތައް އަހަރެއްވުމުން އެ ފައިސާ ހޯދުމަށް ބައެއް ފަރާތްތަކުން އެމައްސަލަ ސިވިލް ކޯޓަށްވެސް ހުށައަޅާފައިވެއެވެ. އަދި ސީ ލައިފާ ގުޅޭ މައްސަލައެއް އެންޓި-ކޮރަޕްޝަން ކޮމިޝަނުންވެސް ގެންދަނީ ބަލަމުންނެވެ.
