ޕާކިސްތާނު ކެބިނެޓަށް ގެނައި އެންމެ ފަހު ބަދަލުތަކަށް އިދިކޮޅު ފަރާތްތަކުން ފާޑު ކިޔައިފިއެވެ. ޕާކިސްތާންގެ ރައީސް އާރިފް އަލްވީ ވަނީ، ފިނޭންސް މިނިސްޓަރުގެ މަގާމަށް، ޝައުކަތު ޓާރީން އަދި އިންފޮމޭޝަން މިނިސްޓަރގެ މަގާމަށް އަނެއްކާވެސް ޝިބްލީ ފަރަޒް އައްޔަން ކުރައްވާފައެވެ.
އިދިކޮޅު ފަރާތްތަކުން ބުނެފައިވަނީ ކޮންމެ ފަހަރަކުވެސް ސަރުކާރުން އައު މާލީ ވަޒީރަކު އައްޔަން ކުރަނީ، ބަޖެޓް ހުށަހެޅުމަށް ދުވަސްކޮޅެއް ވެފައި ވަނިކޮށެވެ. އަދި ތިން އަހަރު ތެރޭ ހަތަރު މާލީ ވަޒީރުން އައްޔަން ކުރުމުން ސަރުކާރުން އަމިއްލައަށް ސާބިތުކޮށްދެނީ ސަރުކާރުގެ މާލީ ސިޔާސަތު ނާކާމިޔާބު ވެފައިވާ ކަމަށެވެ.
މާލީ ވުޒާރާއެކޭ އެއްފަދައިން އިންފޮމޭޝަން މިނިސްޓަރު ވެސް ވަނީ ހަތަރު ފަހަރަށް ބަދަލުކޮށްފައެވެ.
އިދިކޮޅު ފަރާތްތަކުން ބުނި ގޮތުގައި ކެބިނެޓަށް ބަދަލު ގެނައުމަކީ މާނަ ހުރި ކަމެއް ނޫނެވެ. ގައުމަށް ދިމާވެފައިވާ ހުރިހައި ވެސް މައްސަލައަކީ (ސިފައިން) ބޮޑު ވަޒީރުކަމަށް އިޚުތޔާރުކޮށްފައިވާ މީހާގެ ނާގާބިލު ކަމެވެ.
އިދިކޮޅު ދެ ޕާޓީންވެސް ބުނާނީ ގައުމުގެ ހާލަތު އިތުރަށް ގޯސްވަމުންދާ ކަމަށެވެ. އިންފްލޭޝަން އުޅެނީ 14 އިންސައްތައިގައެވެ.އިގްތިސާދު ތަރައްގީ ވުން އުޅެނީ ސުން ޕަސެންޓްގައެވެ. އަދި ހަތަރު މިލިއަން މީހުނަށް ވަޒީފާއެއް ލިބިފައެއް ނުވެއެވެ. 50 މިލިއަން މީހުން އުޅެނީ ފަގީރު ކަމުގައެވެ.
