ސްރީލަންކާގެ އީސްޓަރ ބޮމުގެ ހަމަލާގައި އުޅުނު ޒަހްރާން ހާޝިމީއާއި ބައިވެރިންނަށް ބޮމުގެ ހަމަލާއަށް ހިތްވަރު ދީފައި ވަނީ މައުލަވީ މުހައްމަދު ނައުފަރު (ނައުފަރު މައުލަވީ) ކަމަށް ލަންކާ ސަރުކާރުން ބުނެފިއެވެ. މައުލަވީ ވަނީ ފުލުހުންގެ ބަންދުގައެވެ.
21 އެޕްރީލް 2019ގައި ދީފައިވާ މި ހަމަލާގައި 270 މީހުން މަރުވިއެވެ.
ނޫސްވެރިންނާ ވާހަކަ ދައްކަވަމުން ސްރީލަންކާގެ ސެކިއުރިޓީ މިނިސްޓަރ ދރ. ސަރަތު ވީރަސޭކަރަ ވިދާޅުވީ ޒަހްރާން ހާޝިމީގެ ސިކުނޑި ދޮވެލި މީހަކީ މައުލަވީ ކަމަށެވެ. އަދި އޭނާ ވަނީ އިސްލާމް ސްޓޭޓަށް ހިތްވަރުދީ މީހުންގެ މެދުގައި 2014 އިން ފެށިގެން، ވާހަކަ ދައްކާފައި ކަމަށެވެ.
ޓެރަރިޒަމް އިންވެސްޓިގޭޝަން ޑިވިޝަން އިން ވަނީ ހައްޖުލް އަކްބަރު ނަމަކަސް ކިޔާ މީހަކުވެސް މި ހަމަލާއާ ގުޅުން ހުރިކަމަށް ބުނެ މާޗް 12 ގައި ހައްޔަރުކޮށްފައެވެ. އޭނާ ހައްޔަރުކޮށްފައި ވަނީ ޑެމަޓަގޯޑާގައި ވައްހާބީ ފިކުރާއި ޖިހާދަށް ދިއުމަށް މީހުންނަށް ނަސޭހަތް ދެނިކޮށެވެ.
ލަންކާ ސަރުކާރުން ބުނާ ގޮތުގައި އީސްޓަރ ބޮމުގެ ހަމަލައާ ގުޅިގެން 32 މީހަކު ވަނީ ފާހަގަކޮށްފައެވެ. އަދި މިމީހުން ހައްޔަރުކުރުމަށްޓަކައި މިމީހުންނާ ދެކޮޅަށް ހެކިތައް ވަނީ ހުށަހަޅާފައެވެ. މިހާތަނަށް 75 މީހަކު ވަނީ ހައްޔަރުކޮށްފައެވެ. އަދި 211 މީހަކު ތަހުގީގަށް ބަންދުކޮށްފައި ވެއެވެ.
ސްރީލަންކާގެ ސަރުކާރުން ވަނީ އީސްޓަރ ބޮމުގެ ހަމަލާ އިތުރަށް ދިރާސާކުރުމަށް ކެބިނެޓްގެ ސަބް ކޮމިޓީއެއް އެކުލަވާލާފައެވެ. މިކޮމިޓީގެ ރައީސަކީ ޗަމަލް ރާޖަޕަކްސައެވެ. ޗަމަލް ވަނީ އޭނާގެ ކޮއްކޮ، ރައީސް ރާޖާޕަކްސައަށް ސަބް ކޮމިޓީގެ ރިޕޯޓް ހުށަހަޅުއްވާފައެވެ.
