ޕާކިސްތާންގެ ޚާރިޖީ ވަޒީރު ޝާހް މަހްމޫދު ޤުރެއިޝީ ޔޫއޭއީއަށް ވަޑައިގަންނަވާ ކަން އިޢްލާން ކުރެއްވީ އިއްޔެ އެވެ. އޭގެ އެތައް އިރެއް ފަހުން، އިންޑިއާގެ ޚާރިޖީ ވަޒީރު ސުބްރަމަނިއަން ޖަޔަޝަންކަރު ޔޫއޭއީއަށް ވަޑައިގަންނަވާކަން އިޢްލާން ކުރެއްވީ ޓުއިޓާގައެވެ.
ދެ ބޭފުޅުންވެސް އެއް ފައްތަރެއްގައި ޔޫއޭއީއަށް ވަޑައި ގަންނަވާތީ، ދެ ބޭފުޅުންގެ ބައްދަލުވުމެއް އޮވެދާނެ ކަމަށް ދަނީ ލަފާ ކުރެވެމުންނެވެ.
ޖަޔަޝަންކަރު ޔޫއޭއީއަށް ވަޑައިގަންނަވަނީ، އެގައުމުގެ ޚާރިޖީ ވަޒީރުގެ ދައުވަތަކަށެވެ.
މި ދެބޭފުޅުން ޔޫއޭއީއަށް ވަޑައިގަންނަވާއިރު، އެމެރިކާއަށް ކަނޑައަޅާފައިވާ ޔޫއޭއީ އެމްބެސެޑަރ ޔޫސުފް އަލް ޤުތެއިބާ ވިދާޅުވަނީ އޭނާގެ ގައުމުން އިންޑިއާ ޕާކސްތާން ގެ ސުލްޙައިގެ މަޝްވަރާތަކަށް ފަހިކޮށްދެއްވާފައި ވާނެ ކަމަށެވެ. އަދި ކަޝްމީރުގެ މަސްރަހު ފިނިކޮށްދިނުމަށްވެސް އެހީތެރިވެ ދީފައިވާނެ ކަމަށެވެ. އޭނާ ވިދާޅުވިގޮތުގައި އިންޑިއާއާއި ޕާކިސްތާނަކީ އެންމެ ގާތް ރަހުމަތްތެރިން ކަމުގައި ނުވެދާނެއެވެ. ނަމަވެސް ދެ ގައުމުންވެސް އެއްބަޔަކު އަނެއްބަޔަކަ ވަހަކަ ދެއްކޭ ފެންވަރަށް ގެނަސްދެވިދާނެ ކަމަށެވެ.
ދެ ގައުމުގެ ޚާރިޖީ ވަޒީރުން އެއް ވަގުތެއްގައި ޔޫއޭއީއަށް ވަޑައިގަތްނަވާއިރު، ފެބްރުއަރީ މަހު ދެ ގައުމުންވެސް ވަނީ 2003 ގެ ހަނގުރާމަ ހުއްޓާލުމުގެ އެއްބަސްވުމަށް އިހުތިރާމް ކުރަން ނިންމާފައިވާ ކަމަށް އިޢްލާން ކޮށްފައެވެ. އެއަށްފަހު ޕާކިސްތާންގެ ބޮޑު ވަޒީރު ވިދާޅުވެފައި ވަނީ އިންޑިއާއާ ގުޅުން ރަނގަޅު ކުރުމަށް އުންމީދު ކުރައްވާ ކަމަށެވެ.
