ޗާޑްގެ ވެރިރަށް އެންޖާމީނާއާ ދިމާއަށް ބާޣީންގެ ގާފިލާތައް ދަތުރުކުރަމުންދާ ކަމަށް ބުނެ އެމެރިކާ ރައްޔިތުން ޗާޑުން ބޭރުވުމަށް އެމެރިކާއިން އަންގައިފިއެވެ.
ސޫދާނާއި ލީބިޔާއާއި އިންވެގެން އޮންނަ ޗާޑުގައި ރިއާސީ އިންތިޚާބު ބާއްވައި އިންތިޚާބުގެ ނަތީޖާ ދަނީ ގުނަމުންނެވެ. 30 އަހަރަށް ވުރެން ގިނަ ދުވަސް ވަންދެން ވެރިކަން ކުރާ ޑިކްޓޭޓަރ އިދްރީސް ޑީބީ އިންތިޚާބްގައި ކުރިހޯދާ ކަމަށް އިލެކްޝަން ކޮމިޝަނުން ބުނެއެވެ. ޕެޓްރޯލް ނަގާ މިގައުމުގެ މުއްސަނދިކަން ލޫޓުވާކަމަށް އިދިކޮޅު ފަރާތްތަކުން ރައީސް ޑީބީއަށް ތުހުމަތު ކުރެއެވެ. އޭނާ 1990ގެ ތެރޭގައި ވެރިކަމަށް ވަޑައިގަތީ އިންގިލާބަލުންނެވެ.
އިނގިރޭސިވިލާތުންވެސް ވަނީ ބާޣީން ހަރަކާތްތެރިވަމުންދާ ކަމަށް ބުނެ އިނގިރޭސި ރައްޔިތުން ބޭރުވުމަށް އަންގާފައެވެ. ރޮއިޓަރޒް އިން ބުނާ ގޮތުގައި ގިނަ އަދަދެއްގެ ސިފައިން ވަނީ ވެރިރަށުގެ މަގުތަކަށް ނެރެފައެވެ.
ބާޣީން ފޭސްބުކް ޕޯސްޓެއްގައި ބުނެފައި ވަނީ ޑިޕްލޮމޭޓންނާއި އދގެ މުވައްޒފުންނާއި އެންޖާމީނާގެ ރައްޔިތުންގެ ރައްކާތެރިކަމަށް އެމީހުން ޔަގީންކަން ދޭ ކަމަށެވެ.
ޗާޑްއަކީ އަރަބި ބަހުން ވާހަކަ ދައްކާ އެހެންނަމަވެސް އަރަބ ލީގްގައި ނުހިމެނޭ ގައުމެކެވެ. ރައީސް ޑީބީގެ ވެރިކަން ދަހަމައްޓާފައި ވަނީ އެމެރިކާއާއި ފަރަންސޭސިން ވާގިވެރިވެގެންނެވެ.
