އުޒްބެކިސްތާންގެ ޑިކްޓޭޓަރގެ ދަރިފުޅުގެ ގަނޑުވަރު ނީލަމުގައި ވިއްކާލުމަށް އެގައުމުގެ ސަރުކާރުން ނިންމައިފިއެވެ. ގަލޮޅު ދަނޑުގެ 75 ދަނޑާ އެއްވަރުގެ ސަރަހައްދެއްގައި ހަދާފައިވާ މި ގަނޑުވަރުގައި، ވައިން ހަދާ ފެކްޓްރީއަކާއި އިންޑޯ އަދި އައުޓް ޑޯ ސުއިމިންގ ޕޫލާއި ސިނެމާ ހޯލާއި ޑިސްކޯ ހޯލާއި ޓެނިސް ކޯޓާއި ޖަޕަނީސް ސްޓައިލް ގަރޑަން ހިމނެއެވެ.
މި ގަނޑުވަރަކީ، އުޒުބެކިސްތާންގެ ކުރީގ ޑިކްޓޭޓަރ އިސްލާމް ކަރީމޯވްގެ އަންހެން ދަރިފުޅު ގުލްނާރާ ކަރީމޯވާގެ ގަނޑުވަރެކެވެ.
އިސްލާމް ކަރީމޯވް ވެރިކަން ކުރެއްވީ 27 އަހަރު ވަންދެން، 2016ގައި އޭނާ އަވަހާރަވުމާ ހަމައަށެވެ.
މި ގަނޑުވަރު ހަދާފައިވާ ލޭކް ރިސޯޓް ސަރަހައްދަކީ، ވެރިރަށް ޓެޝްކަންދާއި 60 މޭލު ދުރުގައި އޮންނަ ހިސާބެކެވެ. މިހިސާބުގެ މީހުންގެ އެވަރެޖް މުސާރައަކީ މަހަކަށް 250 އެއްހާ ޑޮލަރެވެ. މި ގަނޑުވަރުގެ ވަށައިގެން އިންދާފައިވަނީ ނޫކުލައިގެ ފިތުރޯން ގަހެވެ. މިއިން ކޮންމެ ގަހެއްގެ އަގަކީ، ފަސްހާސް ޑޮލަރެވެ.
ކަރީމޯވާ އަކީ އޭނާގެ ބައްޕަ ވެރިކަން ކުރި އިރު ގަދަބާރުން ކޮންމެ ވިޔަފާރިއަކުން ހިއްސާއެއް ލިބިގަތް މީހެކެވެ. އަދި މަނީލޯންޑަރިންގެ މައްސަލގައި އެމެރިކާއިން ވަނީ އޭނާގެ މުދާ ހިފަހައްޓައި އޭނާއާ މުއާމަލާތު ކުރުން މަނާ ކޮށްފައެވެ. ސުއިސް ސަރުކާރުންވެސް ވަނީ މަނީ ލޯންޑަރިންގެގެ ތަހުގީގު އޭނާއާއެކު ހިންގާފައެވެ.
މިހާރު ޖަލުގައި ކޮރަޕްޝަންއާއި މަނީ ލޯންޑަރިންގއަށް ހުކުމް ތަންފީޒު ކުރަމުންދާ އުމުރުން 48 އަހަރުގެ ކަރީމޯވާ އަދި އުޒުބެކިސްތާން ސަރކާރުން ބުނާ ގޮތުން 12 ގައުމެއްގައި އެތައް ބިލިއަން ޑޮލަރިގެ މާލީ ޖަރީމާތައް ހިންގާ ގޭންގްތަކާ ގުޅުން އޮންނަ މީހެކެވެ. އޭނާ އެމެރިކާ އަފްޣާން އުޒުބެކް ދަރިކޮޅުގެ މީހަކާ އިނދެގެން ދެކުދިން ލިބިފައި ވެއެވެ. ފިރިމީހާ ވަނީ އޭނާ ވަރި ކޮށްފައެވެ. އެމީހާ އަކީ އުޒުބެކިސްތާންގެ ކޮކާކޯލާ ކުންފުނީގެ ވެރިޔާއެވެ. ވަރިކުރުމަށްފަހު ސަރުކާރުން ވަނީ ކޮކާކޯލާ ކުންފުނި އޭނާގެ ކިބައިން ވަކި ކޮށްފައެވެ.
ކަރީމޯވާއަށް ގާނޫނީ މައްސަލަތައް ކުރިމަތިވާން ފެށީ އޭނާގެ ބައްޕަ ނިޔާވުމުގެ ދެ އަހަރު ކުރިންނެވެ. އޭނާގެ ބައްޕަ އޭނާ ގޭގެ ބަންދުގައިވެސް ބެހެއްޓެވިއެވެ.
