ރަޝިޔާއިން ހުޅަނގުގެ ގައުމުތަކުގައި ގަޑުބަޑު އުފެއްދުމަށް ނިޒާމީ ގޮތަކަށް ރާވައިގެން މަސައްކަތް ކުރާ ކަމަށް ބުނެ ޔޫރަޕުން ފާރަވެރިވާން ފަށައިފިއެވެ. ހުޅޫނަގުގެ ގައުމުތަކުގައި ތިއްބަވާ ރަޝިޔާގެ ޑިޕްލޮމޭޓުންނަށް ސިލްސިލާ ޖާސޫސީ ފަޟީހަތްތަކެއް ކުރިމަތި ވުމުން ރަޝިޔާއާ މެދު ޝައްކުގެ ނަޒަރަކުން ބެލުމަކީ މިހާރު އަނެއްކާވެސް އާންމު ކަމެކެވެ.
ހުޅަނގުގައި ރަޝިޔާއިން ހަމަނުޖެހުން އުފައްދަން މަސައްކަތް ކުރާކަމަށް ޝައްކު ކުރެވުނީ ރަޝިޔާގެ އެޖެންޓަކަށް ލަންޑަންގައި ޒަހަރު ލުމުގެ މައްސަލަ ފެންމަތިވުމުންނެވެ.
މިދިޔަ މަދު މަސްތަކެއްގެ ތެރޭގައި އޮސްޓްރިއާއާއި ބަލްގޭރިއައާއި ޗެކް ރިޕަބްލިކްއާއި ނެދަރލެންޑްސްއާއި ނޯރވޭއާއި ސުއިޑްންއިން ވަނީ ރަޝިޔާގެ ޑިޕްލޮމޭޓުން އެ ގައުމުތަކުން ބޭރުވާން އިންޒާރު ދީފައެވެ. އެންމެ ފަހުން ރަޝިޔާ ޑިޕްލޮމޭޓުން ބޭރުކޮށްފައި ވަނީ އެމެރިކާއިން މިދިޔަ ހަފްތާގައެވެ.
ރަޝިޔާއިން ޖާސޫސް ކުރުމާއެކު، އެމެރިކާއާއި ހުޅަނގުގެ ގައުމުތަކުން ސައިބަރ ހަމަލާތައް ދޭކަމަށްވެސް ތުހުމަތު ކުރެވެއެވެ.
އެންމެ ފަހުން މިމަހު ކުރީކޮޅު، ރަޝިޔާ ޑިޕްލޮމޭޓުން ބޭރުކޮށްފައި ވަނީ އިޓަލީންނެވެ. އެއީ، ކަނޑުގެ ސިފައިންގެ ކެޕްޓަނެއްގެ އަތުން ސިއްރު ޑޮކިއުމެންޓްތަކެއް ހޯދަނިކޮށް ފެނގެންނެވެ.
ރަޝިޔާގެ ގަޑުބަޑު ކުރުމުގެ ހަރަކާތްތައް ޖާސޫސީ އިދާރާތަކުގެ ސަމާލުކަމަށް އައީ 2018 ވަނަ އަހަރު، އިނގިރޭސިވިލާތުގައި ޑަބަލް އެޖެންޓެއް ކަމަށްވާ ސްކްރިޕާލް އަށް ރަޝިޔާގެ އެޖެންޓުން ވިހަދޭން މަސައްކަތް ކުރުމުންނެވެ. އެއަށްފަހު، އަހަރު ދުވަސް ފަހުން، ކުރީގެ ޗެޗްނިޔާ ކޮމާންޑަރަކު ވަނީ ބަރލިން ގެ ޕާކެއްގައި މަރާލާފައެވެ. ޖަރމަނީން ތުހުމަތު ކުރީ ރަޝިޔާއިން ކުރި ކަމެއް ކަމަށެވެ.
ހުޅަނގުން ތުހުމަތު ކުރާ ގޮތުގައި ރަޝިޔާއިން ވަނީ ޕުޓިންގެ ވާދަވެރިޔާ އެލެކްސީ ވާނެލްނީއަށްވެސް ޒަހަރު ލުމަށް މަސައްކަތް ކޮށްފައެވެ.
ރަޝިޔާއިން ކުރަމުންދާ ކަންތައްތައް އަލުން އެއް ތައްގަނޑަކަށް އެޅިގެން ވަޑާ ޖެހިގެން ދިޔައީ 2014 ގައި ޗެކް ޖުމްހޫރިއްޔާގ އިރުމަތީ ޖަންގަލީގެ ތެރޭގައި ހަދާފަ ހުރި ހަތިޔާރު ގުދަނެއްގައި ގޮއްވާލި ހާދިސާ ތަހުގީގު ކުރަމުން ދަނިކޮށް، މިހަފްތާގައި އައު ހެކިތަކެއް ފެނުމުންނެވެ.
އޮކްޓޯބަރު 2014ގައި ގޮއްވާލާފައިވާ ގޮއްވާލުމަށް ފަހު އޭގެ އެއްކިލޯމީޓަރު ދުރުގައި ހުރި އެހެން ތަނެއްގައި ވެސް ގޮއްވާލުމެއް ގޮއްވާލާފައި ވެއެވެ.
އަދި މި ހަތިޔާރު ގުދަން ގެންގުޅު މީހާ އަށް ބަލްގޭރިއާގެ ވެރިރަށް ސޯފިޔާގައި ވިހަލުމަށް މަސައްކަތް ކޮށްފައި ވެއެވެ.
ތަހުގީގަށް މިހާރު ސާބިތުވާ ގޮތުގައި ޔޫރަޕްގައި ހަމަނުޖެހުން އުފެއްދުމުގެ މަސައްކަތުގައި އުޅެނީ ރަޝިޔާގ ސިފައިންގެ މިލިޓަރީ އިންޓެލިޖެންސް ޔުނިޓަކުންނެވެ. ޖީއާރްޔޫ ގެ ނަމުން ނަންދީފައިވާ މިޔުނިޓްގެ ކޯޑަކީ ޔުނިޓް 29155 އެވެ. ޔޫރަޕްގެ ހުރިހައި ހަމަނުޖެހުމެއްގައި މި ޔުނިޓްގެ ނިޝާންތައް ވާކަމަށް ތަހުގީގަށް ވަނީ އެނގިފައެވެ.
މިއީ މަދު އަދަދެއްގެ އިންތިހާއަށް ކުޅަދާނަ އެޖެންޓުން ހިމެނޭ ޔުނިޓެކެވެ.
ލަންޑަންގައި ހިންގފައިވާ ޒަހަރު ލުމުގެ ހާދިސާއާއި ޗެކް ރިޕަބްލިކްގެ ގޮއްވާލުމުގައި ވެސް ބައިވެރިވެފައިވަނީ ދެ މީހެކެވެ. މި ދެމީހުންނަކީ ތަފާތު ނަންނަމުގައި އެކި ޕާސްޕޯޓްތަކުގައި ދަތުރުކޮށްފައިވާ ބައެއްކަން ވަނީ އެނގިފައެވެ.
ރަޝިޔާއިން ގިނަ އަދަދެއްގެ ސިފައިން ޔުކްރޭންގެ ބޯޑަރު މައްޗަށް ޖަމާކޮށްފައިވާ ހިނދު، އަދި އެމެރިކއިން ރަޝިޔާގެ 10 ޑިޕްލޮމޭޓުން ބޭރުކޮށްފައިވާ ހިނދު، އަލަށް ޗެކް ރިޕަބްލިކްގެ ތަހުގީގުން ލިބިފައިޥާ މަޢްލޫމާތުން ހުޅަނގުގެ ގައުމުތައް އިތުރަށް އުދާސްކަމެއްގެ ތެރެއަށް ވައްޓާލާނެ ކަމަށް ބެލެވެއެވެ.
މިއައު މަޢްލޫމާތާއެކު ޗެކް ރިޕަބްލިކް ގައި މީހުން ވަނީ ރަޝިޔާއާ ދެކޮޅަށް މުޒާހަރާއަށް ނިކުމެ، ރަޝިޔާގެ އެމްބަސީއަށް ކަޅުތެޔޮ ޖަހާފައެވެ.
