ލަންކާ ކްރިސްޓިއަނުންގެ އިސްފާދިރީ އަކީ ޑަބަލް އެޖެންޓެއް: ބޮޑު ބަލަ ސޭނާ
އީސްޓަރ ބޮމުގެ ހަމަލާއާ ދިމާކޮށް ލަންކާ ކްރިސްޓިއަނުންގެ އިސް ފާދިރީ މެލްކޮމް ކަރޑިނަލް ރަންޖިތު މުސްލިމުންނަށް އަމާޒު ކޮށް ހަމަލަތަކެއް ދެއްވައިފިއެވެ. އޭނާ ވިދާޅުވީ މިހަމަލާއަކީ، ގައުމުގެ އެތެރޭން ސިޔާސީ ބައެއްގެ ވާގިވެރިކަމާއި ބޭރު ބައެއްގެ ތާއީދާއެކު ދީފައިވާ ހަމަލާއެއް ކަމަށެވެ. އަދި ލަންކާގެ ކުރީގެ ރައީސް ސިރިސޭނާއާއި ބޮޑު ވަޒީރު ވިކްރަމަސިންހައަށް ފާޑުވިދާޅުވަމުން އޭނާ އެބޭފުޅުން ސިފަ ކުރެއްވީ ހަރުކަށި މުސްލިމުންނަށް ހިތްވަރު ދެއްވާ ބޭފުޅުންގެ ގޮތުގައެވެ.
އާދީއްތަ ދުވަހު ފާދިރީ ދެއްވި ނޫސްކޮންފަރެންސަށް ރައްދު ދެއްވަމުން، މިއަދު ބޮޑު ބަލަ ސޭނާގެ ޖެނެރަލް ސެކެޓްރީ ފާދިރީ ގަލަގޯޑާ ގަނަނަސޭރާ ތޭރޯ ސިފަ ކުރެއްވީ ރަންޖިތުއަކީ ދެފުށަށް ކެނޑޭ ޑަބަލް އެޖެންޓެއްގެ ގޮތުގައެވެ.
ބޮޑު ބަލަ ސޭނާ އިން މާނަކުރިގޮތުގައި ރަންޖިތު ސިފަ ކުރެއްވި އެތެރޭގެ ސިޔާސީ ބަޔަކީ، ބޮޑުބަލަ ސޭނާއެވެ.
ސިންގަޅަ ބުޑިސްޓުންނާއި ކްރިސްޓިއަން އިސްފާދިރީގެ ބަހުގެ ހަމަލާތައް ދިމާވެފައި ވަނީ ލަންކާ ސަރުކާރުން މުސްލިމުންނާއި ޖެފްނާ ތަމަޅައިންނަށް އަމާޒުކޯށް އައު ބުރަކަށް ހަރުކަށި ކަން ދައްކަމުންދާ ދުވަސްވަރެއްގައެވެ.
މީގެ އިތުރުން ސްރީލަންކާގެ އިންސާނީ ހައްގުތަކުގެ ރެކޯޑާ ގުޅިގެން ހުޅަނގުގެ ގައުމުތަކުންވެސް ދަނީ ފިއްތުންތައް ކުރިމަތި ކުރަމުންނެވެ.
މީޑިއާގައި މުހައްލިލުން ބުނާ ގޮތުން ލަންކާގެ އިގްތިސާދު އަނދަވަޅަކަށް ވެއްޓި ދުވަހަކުވެސް ރުޕީސްގެ އަގު ނުވެއްޓޭ ވަރަށް އިންފްލޭޝަން މަތިވުމާއި އެތެރޭގެ ސިޔާސީ ކޯޅުންތަކާއި ވެރިކަން ކުރާ ޕާޓީގެ އެތެރޭގެ ހަމަނުޖެހުންތައް އޮއްބާލުމަށްޓަކައި އެހެން ބަޔަކަށް އަމާޒުކޮށް ދުޝްމަނުންތަކެއްގެ ގޮތުގައި ދެއްކުމަށް މިދަނޑިވަޅުގައި ދަނީ މަސައްކަތް ކުރަމުންނެވެ.
