އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާނު ކުރުމުގެ ބާރު ރައީސުލްޖުމްހޫރިއްޔާއަށް ދިނުމަށް މަޖިލީހުގެ ޖުޑިޝަރީ ކޮމިޓީން ފާސްކޮށްފިއެވެ.
އާންމު ސިއްހަތު ރައްކާތެރިކުރުމުގެ ޤާނޫނަށް އިސްލާހު ގެނައުމުގެ ބިލު ދިރާސާކޮށް ކޮމިޓީން ނިންމި އިރު ބިލަށް ބަދަލުގެނެސްފައިވާ ގޮތުން، އާންމު ސިއްހަތުގެ ނުރައްކާތެރި ބަލިމަޑުކަމެއް ކުރިމަތިވެއްޖެނަމަ، ރާއްޖޭގެ ހުރިހާ ސަރަހައްދެއްގައި ނުވަތަ ކަނޑައެޅޭ ވަކި ސަރަހައްދެއްގައި އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާނު ކުރުމުގެ ބާރު ލިބިގެންވަނީ ރައީސުލްޖުމްހޫރިއްޔާއަށެވެ.
އަދި އާންމު ސިއްހަތުގެ ކުއްލި ނުރައްކަލުގެ ހާލަތެއް ކުރިމަތިވެއްޖެކަމަށް އެކަށީގެންވާ ހެކީގެ މައްޗަށް ބިނާކޮށް، ޑިރެކްޓަރ ޖެނެރަލްއަށް ފެނިއްޖެނަމަ. އެކަން ވަޒީރަށް އަންގައި، އެކަމުގެ ލަފާ ވަޒީރު ރައީސަށް އަރުވަންޖެހޭނެ ކަމަށްވެސް ބިލުގައިވެއެވެ. އަދި އާންމު ސިއްހަތުގެ ކުއްލި ނުރައްކަލުގެ ހާލަތެއް ކުރިމަތިވެއްޖެކަމަށް ރައީސުލްޖުމްހޫރިއްޔާ އިއުލާނުކުރާ ހާލަތުގައި އަމަލުކުރާނީ ގާނޫނުއަސާސީގެ ކުއްލި ނުރައްކަލުގެ ހާލަތު ބާބުގައިވާ ގޮތަށް ކަމަށްވެސް އިސްލާހުގައިވެއެވެ.
ކޮމިޓީން މި ބާރު ރައީސުލްޖުމްހޫރިއްޔާއަށް ދިނުމަށް ނިންމާފައިވަނީ، އާންމު ސިއްހަތުގެ ކުއްލި ނުރައްކަލުގެ ހާލަތަކީ، ކަމާގުޅުންހުރި މިނިސްޓަރު އިއުލާނުކުރާ ކުއްލި ނުރައްކަލުގެ ހާލަތެއްގެ ބަދަލުގައި، ޤާނޫޏުއަސާސީގެ 253 ވަނަ މާއްދާއިން އެއީ ރައީސުލްޖުމްހޫރިއްޔާއަށް ލިބިދީފައިވާ ބާރެއްކަމަސްވާތީ، އެ މާއްދާގައިވާ ގޮތުގެމަތިން، އެއީ ރައީސުލްޖުމްހޫރިއްާ އިއުލާޏުކުރައްވާ ކުއްލި ނުރައްކަލުގެ ހާލަތެއްގެ ގޮތުގައި ކަނޑައެޅުމުގެ ގޮތުން ކަމަށެވެ.
އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާނު ކުރުމުގެ ބާރު ގާނޫނުގެ ދަށުން މިހާރު އޮންނަނީ އެޗްޕީއޭގެ ޑިރެކްޓާ ޖެނެރަލްގެ ލަފާގެ މަތިން ހެލްތް މިނިސްޓަރަށެވެ.
