ކުރިއަށް އޮތް 48 ގަޑި އިރުތެރޭ އެމެރިކާއިން ވެކްސިން އަށް ބޭނުންވާ ރޯމެޓީރިއަލްއާއި އޮކްސިޖަން ކޮންސެންޓްރޭޓަރއާއި ވެންޓިލޭޓަރާއި، ޕީޕީއީ ކިޓްތައް އިންޑިއާއަށް ފޮނުވާނެ ކަމުގެ ގެރެންޓީ އެމެރިކާގެ ގައުމީ ސަލާމަތާ ބެހޭ މުޝީރު ޖެކް ސުލިވަން ދެއްވައިފިއެވެ. އޭނާ ވަނީ އިންޑިއާގެ ގައުމީ ސަލާމަތާ ބެހޭ މުޝީރު އަޖިތު ޑޯވަލްއާ 45 މިނެޓް ވަންދެން ފޯނުން ވާހަކަ ދައްކަވާފައެވެ.
ސުލިވަން ވިދާޅުވީ، ކޮވިޑް19ގެ ފުރަތަމަ ރާޅުގައި އެމެރިކާ ކޮންޓްރޯލުން ނެއްޓިގެން އުޅުނު އިރު އިންޑިއާއިން ވަނީ އެހީތެރިވެ ދީފައިވާ ކަމަށާއި އެމެރިކާއިން ދަނީ ލިބެން ހުރިހައި ހުރިހައި ވަސީލަތެއް އެއްކޮށް އިންޑިއާއަށް ފޮނުވުމަށް ތައްޔާރު ކުރަމުންނެވެ.
އެމެރިކާގެ ރައީސް ޖޯ ބައިޑެންވެސް މިއަދު ކުރެއްވި ޓުއީޓެއްގައި ވިދާޅުވީ، އެމެރިކާގެ ހަސްފަތާލުތަކަށް އެހީ ބޭނުންވިއިރު އިންޑިއާއިން އެހީވެދިން ކަމަށެވެ. އެހެންވެ، އިންޑިއާއަށް އެހީވެ ދިނުމަށް އެމެރިކާއިން އަޒުމު ކަނޑައަޅާފައިވާ ކަމަށެވެ.
މީޑިއާ ރިޕޯޓްތައް ބުނާ ގޮތުން ޑޯވެލް ވަނީ، ޔޫއޭއީއާއި ސައޫދީ އަރަބިއްޔާގެ މަސްއޫލިވެރިންނާ ވެސް ވާހަކަ ދައްކަވާފައެވެ. މި ދެގައުމުންވެސް ވަނީ އޮކްސިޖަން ޓޭންކަރތައް އިންޑިއާއަށް ދިނުމަށް ނިންމާފައެވެ. ސައޫދީގެ ޝިޕްމެންޓް މިހާރު ވަނީ ފުރާފައެވެ.
އިންޑިއާގެ އެކްސްޓަރނަލް އެފެއާޒް މިނިސްޓަރ ޖަޔަ ޝަންކަރުވެސް ގެންދަވަނީ ރަހްމަތްތެރި ގައުމުތަކާ ގުޅުއްވައިގެން އެހީގެ މަޝްވަރާތައް ބާއްވަވަމުންނެވެ.
