ސިޔާސަތުތައް ބައްޓަންކޮށް، ބަޖެޓް ހޭދަ ކުރުމަށް އަބަދުވެސް ދުޝްމަނެއް އޮންނަ ޖެހެއެވެ. ކުރިން ފިނި ހަނގުރާމައާއި ރޫސީވިލާތެވެ. ރޫސީވިލާތް ރޫޅިދާނެހެން ހީވުމުން، ދެން ދުނިޔެއަށް ދެއްކި ބިރަކީ، ނުވަތަ ދުޝްމަނަކީ، މުސްލިމުންނެވެ. މިބަޔަކު އެމީހުންގެ ޚިޔާލުން އުފެއްދި ދުޝްމަނުންނާ ހަނގުރާމަ ކުރަމުން ދަނިކޮށް، ކޮވިޑް-19 އަށް ފަހު ހޭވެރިކަމެއް ވީއިރު، މި ބައި މީހުން ކުރުނީސްކޮށްލި ބާރަކީ ޗައިނާއެވެ.
މިހާރު ދުނިޔެ މަޝްޣޫލުވެފައި ވަނީ ޗައިނާއާ މެދުއެވެ. އެވެސް އެމެރިކާއިން ޓެކްނޮލޮޖީއާއި ފައިސާ ދީގެން އަމިއްލަ މަސްލަހަތާ ދެކޮޅަށް އުފެއްދި ހަތުރެއް ކަން ކަށަވަރެވެ.
މިއަދުގެ ބަހުސަކީ ޗައިނާގެ ދިފާއީ ބަޖެޓާ ބެހޭ ގޮތުންނެވެ. 2019ގައި ޗައިނާގެ ދިފާއީ ބަޖެޓްކަމަށް ލަފާކޮށްފައި ވަނީ 261 ބިލިއަން އެމެރިކާ ޑޮލަރެވެ. މި އަންދާސާއަކީ، ސްކޮޓޮކްހޯމް އިންޓަރނޭޝަނަލް ޕީސް ރިސަރޗް އިންސްޓިއުޓްގެ އަންދާސާއެވެ. ޗައިނާގެ ކަމަކާ ގުޅޭ ގޮތުން ސާފު އަދަދެއް ލިބުމަކީ އުނދަނގޫ ކަމެކެވެ.
ޗައިނާއިން ވަނީ ބޮޑެތި އަދަދުން ސިފައިންނަށް ހޭދަކޮށް ޗައިނާގެ އަސްކަރީ މުއައްސަސާއަކީ، ތަރައްގީވެފައިވާ ދުނިޔޭގެ ފެންވަރުގެ އެންމެ ކުރީގައި އުޅޭ ބާރުގަދަ ފައުޖަކަށް ހަދާފައެވެ. މީގައި ޗައިނާގެ އެއްގަމާއި ކަނޑުގެ ސިފައިންނާއި ވައިގެ ސިފައިން ތަރައްގީ ކުރުން ހިމެނެއެވެ. މީގައި ޗައިނާއިން ޖައްވީ ކަންތައްތަކަށް ކުރާ ހޭދަ ހިމަނާފައެއް ނުވެއެވެ.
ޗައިނާއިން 2010 އިން ފެށިގެން 2017 އާ ހަމައަށް އަސްކަރީ ހަރޑްވެއަރ ގަތުމަށް ކުރީއަހަރުތަކާ އަޅާ ބަލާއިރު 40 ޕަސެންޓް އިތުރަށް ފައިސާ ހޭދަކޮށްފައި ވެއެވެ.
ޗައިނާއަކީ އެގައުމުގެ އަސްކަރީ ސާމާނުތައް އިމްޕޯޓް ކުރުމުގައި ހަތަރުބައިކުޅަ ތިން ބައި ރަޝިޔާއިން އިމްޕޯޓް ކުރާ ގައުމެކެވެ.
ޗައިނާއިން 2021 އަށް ހާމަކޮށްފައިވާ އަދަދުތަކުން ދޭހަވަނީ، ހިނގަމުން މިދާ އަހަރުގެ ތެރޭގައި ޗައިނާއިން 209 ބިލިއަން އެމެރިކާ ޑޮލަރު އަސްކަރީ ކަންކަމަށް ހޭދަ ކުރާނެ ކަމަށެވެ. މިއީ 2020ގެ ބަޖެޓްގެ ނިސްބަތުން 6.8 އިންސައްތަ ބޮޑު އަދަދެކެވެ.
ޗައިނާއަކީ އެމެރިކާއަށް ފަހު ދެވަނައަށް އެންމެ ގިނައިން އަސްކަރީ ކަންކަމަށް ހޭދަކުރާ ގައުމެވެ. އަދި އިންޑިއާގެ އަސްކަރީ ހޭދައަށް ވުރެން ތިން ގުނަ އިތުރަށް ޗައިނާއިން ހޭދަ ކުރެއެވެ. ޗައިނާގެ އަސްކަރީ ހޭދަ ޖީޑީޕީގެ ނިސްބަތުން ބަލައިފިނަމަ އެއީ، ޖީޑީޕީގެ 1.7 އިންސައްތައެވެ.
ޗައިނާއިން އަސްކަރީ ހޭދަ ބޮޑުކޮށްފައިވާ އިރު ފެންނަނީ، ޗައިނާއިން ދެމެހެއްޓެނިވި ގޮތެއްގައި ޗައިނާގެ ސިފައިންނާއި ސިފައިންގެ ވަސީލަތަތްތައް ޒަމާނީ ސާމާނަށް ބަދަލުކޮށްފައިވާ ކަމެވެ.
ޗައިނާއިން އިންޑިއާގެ ލަދާކް ސަރަހައްދުގައި އަސްކަރީ ތަމްރީންގެ ނަމުގައި 60 ހާސް ސިފައިން ރުކުރުވާލި އިރު ފެނިގެން ގޮސްފައި ވަނީ ޒަމާނީ ހަތިޔާރާއެކު އެމީހުން އިންޑިއާގެ ސަރަހައްދު ހިފި ތަނެވެ. މީގެ އިތުރުން ޗައިނާގެ ސިފައިން ތިބުމަށް ލަދާކް ސަރަހައްދުގައި ގާއިމްކޮށްފައި ހުރިތަންތަނަކީވެސް އެންމެ ޒަމާނީ ފަސޭހަތަކާއެކު ފެންވަރު ރަނގަޅުކޮށް ހަދާފައިވާ ތަންތަނެވެ. ޚުލާސާއަކީ، ޗައިނާއިން އަސްކަރީ ހޭދަ އިތުރުކޮށް، ސިފައިން ޒަމާނީ ފެންވަރަށް ތައްޔާރު ކުރަމުންދާއިރު ޗައިނާއަކީ ދެންތިބީން ބިރުގަންނަން ޖެހޭ ފަދަ ބާރެކެވެ!
