މެދުއިރުމަތީގައި ސިޔާސީ ދަތުރުތަކާއި ސިޔާސީ މަޝްވަރާތަކެއް ފަށައިފިއެވެ. އެމެރިކާ އިން އިޢްލާން ކޮށްފައިވާ ގޮތުގައި ޚާރިޖީ ވުޒާރާއާއި ދިފާއީ ވުޒާރާއާއި ގައުމީ ސަލާމަތާ ބެހޭ މަޖިލިސްގެ ވަފްދެއް މި ހަފްތާގައި މެދުއިރުމައްޗަށް ދަތުރެއް ކުރާނެ އެވެ. މި ވަފްދުގެ ދަތުރުގައި، އަބޫދާބީ ޢައްމާން، ޤާހިރާ އަދި ރިޔާޟަށް ވަޑައިގަންނަވާނެއެވެ.
ނިއުޔޯރކް ޓައިމްސްގައި އިރާގާއި އީރާންގެ މަސްއޫލުވެރިންނަށް ހަވާލާ ދީ ބުނެފައި ވަނީ، ބަޣްދާދްގައި އީރާނާއި ސައޫދީ އަރަބިއްޔާގެ ޖާސޫސީ އިދާރާގެ ވެރިންގެ ފެންވަރުގައި މަޝްވަރާތައް ބާއްވާފައިވާ ކަމަށެވެ.
ސަޢުދީގެ ފަރާތުން މިމަޝްވަރާތަކުގައި ބައިވެރިވެވަޑައިގަތީ އިންޓެލިޖެންސް ޗީފް ޚާލިދް ބިން އަލީ އައްލުޙައިދާންއެވެ. އަދި އީރާނުން އެގައުމުގެ ޖާސުސީ އިދާރާގެ ވެރިޔާ ސަޢީދު އިރާފާނީ އެވެ.
ފައިނޭންޝަލް ޓައިމްސްއިން ވެސް ވަނީ މި ބޭފުޅުންގެ ބައްދަލުވުމެއް އޮތްކަމަށް ރިޕޯޓް ކޮށްފައެވެ. މި މައްދަލުވުން އޮތީ އެޕްރީލް 9 ގައެވެ.
ސައުދީން އީރާނާއެކު މަޝްވަރާ ކުރަން ބޭނުންވާ އެންމެ މުހިންމު މައްސަލައަކީ ޔަމަންގެ މައްސަލައެވެ. ހޫތީން ސަޢޫދީއަށް ދެމުންދާ ރޮކެޓް ހަމަލާއާއި ޑްރޯން ހަމަލާއަކީ ސައޫދީއަށް ބޮޑު މައްސަލައެވެ.
އެމެރިކާގެ ވަފްދުންވެސް ޔަމަންގެ ސުލްހައަށް ވާހަކަ ދައްކަވާނެ ކަމަށް ބެލެވެއެވެ.
އެމެރިކާ ވަފްދުގެ ދަތުރުގައި ޢައްމާން ހިމެނިފައި އޮތުމުން، އުރުދުންގެ ޢަބްދުﷲ ރަސްގެފާނާއެކު ބާއްވާ މަޝްވަރާތައް ވެގެންދާނީ ފަލަސްތީނާއި އިޒްރޭލުގެ ސުލްޙައާ ގުޅޭ މަޝްވަރާތަކެއް ކަމަށް ބެލެވެއެވެ.
ރައީސް ބައިޑެން ބާރުއަޅުއްވަނީ އިންސާނީ ހައްގަކީ އޭނާގެ ޚާރިޖީ ސިޔާސަތުގައި މުހިންމު ކަމެއް ކަމަށެވެ. ގުދުސްގައި މެދުނުކެނޑި މުޒާހަރާތައް ބާއްވައި، އެންމެ ފަހުން ޔަހޫދީން ވަނީ އިއްޔެ ގުދުސްގެ ކްރިސްޓިއަނުންގެ އިޙުތިފާލަކަށްވެސް ހުރަސް އަޅާފައެވެ.
