ގަރުނުތަކަށް އަލްޖަޒާއިރާއި މުސްލިމު ބިންތައް އިސްތިއުމާރު ކުރުމުގެ ނަތީޖާއަކީ، ފަރަންސޭސިވިލާތުގެ ބޮޑު ދޮރާށީގައި މުސްލިމުން ގޮށް މުށުން ޓަކި ތެޅުމެވެ. ސެކިއުލަރ ލީޑަރެއްކަމަށް ދައްކާ ފަރަންސޭސިވިލާތަކީ، ޔޫރަޕްގައި އެންމެ މުސްލިމު އާބާދީ ބޮޑު ގައުމެވެ. އެސާހިތަކުން މުސްލިމުން ވެގެންދާނީ ފަރަންސޭސިވިލާތުގެ އަމުރުބިލްމައުރޫފް ހިންގަން ތިބޭނެ ބަޔަކަށެވެ.
ފަރަންސޭސި ޒުވާން މުސްލިމު އަންހެނުން ފަށާފައިވާ ކެމްޕޭނަކީ "މަގޭ ބުރުގާއާ ނުބެހޭތި!" ކެމްޕޭނެކެވެ.
ފަރަންސޭސިވިލާތުން ވަނީ މުސްލިމުންގެ މިނިވަންކަން ހަނިކުރުމަށް އަމާޒުކޮށްގެން ގާނޫނާއި ގަވާއިދު ތަކެއް ހަދައިފައެވެ. ސެނެޓުން ފާސްކުރަން އުޅޭ ގާނޫނު ފާސްވެއްޖެނަމަ، އުމުރުން 18 އަހަރު ދަށުގެ ކުދިންނަށް ބުރުގާ އަޅައިގެން ނޫޅެވޭނެއެވެ. ފަރަންސޭސި ގާނޫނުގެ މަގްސަދަކީ، ކުޑަކުދިންނަށް ދީނީ ޝިއާރުތައް މައިބަފައިން މަޖުބޫރު ކުރުން މަނާ ކުރުމެވެ.
ފަރަންސޭސިވިލާތުގައި ކުޑަ ކުދިންނަކީ މިހާރު އުމުރުން 16 އަހަރުގެ ކުދިންނެވެ. މިކަން މިގޮތަށް ނިންމަން ޖެހުނީ، ގައުމުގެ މަޝްހޫރު ފިރިހެން ފައިސޫފަކު އަހަރުތަކެއް ވަންދެން އޭނާގެ ދޮންދަރިފުޅު (ފިރިހެން ކުއްޖެއް)ގެ ގަޔަށް އަރާފައިވާ ކަމަށް، މީގެ މަހެއް ކުރުން ޝާއިއުކޮށްފައިވާ ފޮތެއްގައި ތުހުމަތުކޮށްގެން ޕެރިހުގެ ތަޢްލީމީ ފަންތީގެ މީހުންގެ މެދުގެ މައްސަލަ ބަހުސަކަށް ވެގެން ދިއުމުންނެވެ.
ފަރަންސޭސި އަންހެން ކުދިން ވަނީ HandsOffMyHijab (#PasToucheAMonHijab)# މަގޭ ބުރުގާއާއި ނުބެހޭތި ހޭޝްޓެގް ވައިރަލް ކުރަން ފަށާފައެވެ.
މީސްމީޑިއާގެ ނުފޫޒުގަދަ ފަރާތްތަކުން ދަނީ މިމީހުންގެ ގޮވެއްޔަށް ވާގިވެރިވަމުންނެވެ. އޭގެ ތެރޭގައި، އިބްތިހާޖް މުޙައްމަދުވެސް ހިމެނެއެވެ.
އިބްތިހާޖަކީ، ބުރުގާ އަޅައިގެން އޮލިމްޕިކްގައި ވާދަކުރި އެމެރިކާގެ ފުރަތަމަ އެތުލީޓެވެ.
މީގެ ކުރިން ފްރާންސުން ވަނީ އާންމު ތަންތާނގައި މޫނު ބުރުގާ އެޅުން މަނާކޮށްފައެވެ.
އިންސާނީ ހައްގުތަކުގައި އެންމެ ކުރީ ސަފުގައި ކަމަށް ދައުވާ ކުރާ ފްރާންސުން އަލްޖަޒާއިރުގައި ހިންގާފައިވާ ގަތުލުއާންމަށް އަދިވެސް މައާފަށް އެދިފައެއް ނުވެއެވެ. އެވާހަކަ ދައްކަން ޕެރިހުން ލަދުވެތި ވެއެވެ. އަލްޖަޒާއިރުއުގެ ޚަޒާނާ ލޫޓުވާލި މައްސަލާގައި ވާހަކަ ދައްކަން ޕެރިހުން ލަދުގަނެއެވެ.
އަލްޖަޒާއިރުގެ ދަނގަޑު ފޭރިގެން ޕެރިހުގެ އައިފެލް ޓަވަރު ހެދި މައްސަލާގައި މައާފަށް ވެސް އެދޭކަށް ބޭނުމެއް ނޫނެވެ. އަދި ބަދަލު ދޭކަށްވެސް ބޭނުމެއް ނުވެއެވެ.
