އިންޑިއާގެ 5ޖީ ނެޓްވަރކްގައި ޗައިނާގެ ވާވޭ ކުންފުންޏާއި ޒެޑްޓީއީ ބައިވެރި ނުކުރާން ނިއުދިއްލީން ނިންމުމުން ޗައިނާއިން އެކަމާ މެދު ނުރުހުން ފާޅުކޮށްފިއެވެ. ނިއުދިއްލީގައި ހުންނަ ޗައިނާ އެމްބަސީން ނެރުނު ބަޔާނެއްގައި ބުނެފައިވަނީ މީގެ ސަބަބުން ވިޔަފާރީގެ މާހައުލަށް ނޭދެވޭ އަސަރު ކުރާނެ ކަމަށެވެ.
އިންޑިއާ ސަރުކާރުން ވަނީ 5ޖީ ޓެކްނޮލޮޖީ އަޖުމަ ބެލުމަށް ހަމަސް ދުވަހުގެ މުއްދަތެއްގައި ޓެސްޓް ކުރުމަށް އެތައް ކުންފުންޏަކަށް ހުއްދަ ދީފައެވެ. މީގައި ޗައިނާ ކުންފުންޏެއް ނުހިމެނެއެވެ.
އެމެރިކާއިން ބުނާ ގޮތުން ވާވެއާއި ޒެޑްޓީއީއަކީ، މުވާސަލާތީ ވިއުގަ ތަކުގައި ބޭނުންކުރަން އެކަށީގެންވާ ސާމާނުތަކެއް ނޫނެވެ. އަދި ގައުމީ ސަލާމަތަށް މިއިން ނުރަކާ ކުރިމަތިވެދާނެތީ މި ކުންފުނިތަކުގެ އުފެއްދުންތައް ބޭނުން ނުކުރުމަށްވެސް އެމެރިކާއިން ވަނީ ނިންމާފައެވެ.
އިންޑިއާއިން ކޮވިޑްގެ ފުރަތަމަ ރާޅުގައި އުޅުނު އިރު ޗައިނާއިން ވަނީ އިންޑިއާގެ ލަދާކަށް ގިނަ އަދަދެއްގެ ސިފައިން ވައްދައި އިންޑިއާގެ ބިންތައް ހިފާފައެވެ. މި ހަމަނުޖެހުންތަކުގައި އިންޑިއާގެ އެތައް ދޮޅަސް ސިފައިންނެއް މަރުވެފައި ވެއެވެ.
