އޮސްޓްރޭލިއާއިން ޗައިނާއާއެކު ވެފައިވާ ވިޔަފާރި އެއްބަސްވުން އުވާލުމުން ބަދަލު ހިފުމުގެ ގޮތުން ޗައިނާއިން ވަނީ އޮސްޓްރޭލިއާއާއެކު ވެފައިވާ އެއްބަސްވުން ބާޠިލުކޮށްފައެވެ. ޗައިނާއިން އިން ވަނީ އޮސްޓްރޭލިއާގެ ބައެއް މަސްއޫލުވެރިންނަކީ ފިނި ހަނގުރާމައިގެ ވިސްނުމުން ވިސްނަވާ ބޭފުޅުން ކަމަށްވެސް ސިފަކޮށްފައެވެ.
ޗައިނާގެ މިފިޔަވަޅު އައިސްފައި ވަނީ އޮސްޓްރޭލިއާގެ ބޮޑު ވަޒީރު ސްކޮޓް މޮރިސަން، ވިކްޓޯރިއާ ސްޓޭޓާއި ޗައިނާއާ ދެމެދު ވެފައިވާ ބެލްޓް އެންޑް ރޯދް އެއްބަސްވުން އުވާލުމަށް ނިންމެވުމާ ގުޅިގެންނެވެ.
ޗައިނާއިން ބުނެފައި ވަނީ މި ފިޔަވަޅުން ދެ ގައުމުގެ ގުޅުމަށް ސީރިއަސް އަސަރުތަކެއް ކުރާނެ ކަމަށެވެ.
އޮސްޓްރޭލިއާއިން ގެންދަނީ އިތުރު ފިޔަވަޅެއްގެ ގޮތުން، ޑަރވިން ޕޯޓާ ޗައިނާއާ ދެމެދު ވެފައިވާ 99 އަހަރުގެ ލީޒް އެއްބަސްވުމާ މެދުވެސް ގޮތެއް ނިންމުމަށް މަސައްކަތް ކުރަމުންނެވެ.
އޮސްޓްރޭލިއާގެ އުތުރުގެ މުހިންމު ބަނދަރެއް ކަމަށްވާ ޑަރވިން ޕޯޓަކީ، އޭޝިއާއާ އެންމެ ކައިރި ބަނދަރެވެ. އަދި މިއީ އެމެރިކާ ސިފައިންގެ މަރުކަޒެއްވެސް މެއެވެ.
ބެލެވޭ ގޮތުގައި ގައުމީ ސަލާމަތީ ސަބަބުތަކަށް ޓަކައި، ޗައިނާ ކުންފުނީގެ ހިއްސާ އަނބުރާ ވިއްކާލުމަށް، އޮސްޓްރޭލިއާއިން ޗައިނާ ކުންފުންޏަށް އަންގާނެއެވެ.
