ޚަރަދު ކުޑަ ގޮތަކަށް އާންމު ރައްޔިތުންނަށް ހިތުގެ ބަލިތަކަށް ފަރުވާ ކޮށްދިން ޒުވާން ޑޮކްޓަރު 10 ދުވަސްވަންދެން ކޮވިޑްގެ ބަލީގައި އުޅުމަށްފަހު ނިޔާވެއްޖެވެ. ޑރ. ފަޒަލް ކަރީމްގެ ފުރާނައަށް މާތްﷲ ސުވަރުގޭގެ ދާއިމީ ނިޢުމަތް މިންވަރު ކުރައްވާށި!
އޭނާއަކީ، އިންޑިއާގެ ލަކްނައުގެ އީރާ ހޮސްޕިޓަލްގެ ކާޑިއޮލޮޖީ ޑިޕާޓްމަންޓްގެ ވެރިޔާއެވެ. ގިނަ ފަހަރަށް އޭނާއާ މީހުންނާ ބައްދަލު ވާނީ އައިއައިސީޔޫއިންނެވެ. މުޅި މަސައްކަތް އޭނާ ޚާއްސަ ކޮށްފައި އޮތީ ބަލި މީހުންގެ ފަރުވާއަށެވެ.
ލަކްނައުގެ މެޑިކަލް ދާއިރާއަށް ދާއިމީ ގޮތަކަށް ޑރ. ކަރީމް ގެއްލިގެން ދިއުމުގެ ބޮޑު ހިތާމައާ ކުރިމަތިލާން ޖެހިފައި ވެއެވެ.
ފެންވަރު ރަނގަޅު ޑޮކްޓަރެއް އުފެއްދެނީ އަހަރުތަކެއްގެ މަސައްކަތުންނެވެ. އަދި މީހާގެ ފުށުން އެތައް ގުރުބާނީއަކާވެސް ލައިގެންނެވެ.
ޑރ. ކަރީމް ޕޯސްޓްގްރެޖުއޭޓް ސްޓަޑީޒް ނިންމީ، އިންޑިއާގެ އެއްވަނަ ކަމުގައިވާ، ޕޯސްޓްގްރެޖުއޭޓް އިންސްޓިއުޓް އޮފް މެޑިކަލް އެޑިއުކޭޝަން އެންޑް ރިސަރޗް ޗަންދީގަޅް އިންނެވެ. އަދި ޑީއެމް ހެއްދެވީ ކާރޑިއޮލޮޖީންނެވެ.
2015 ގައި ފޯރޓިސް ގައި މަސައްކަތް ކުރުމަށްފަހު އާންމުންނަށް އަގުހެޔޮކޮށް ފަރުވާ ދެއްވުމަށް އޭނާ އީރާ ހޮސްޕިޓަލް ކޮލެޖަށް ބަދަލުވީއެވެ.
އޭނާގެ ބަލި މީހުންގެ އޮޕަރޭޝަނަށްފަހު އޭނާ އެމީހުންނާ އެކު ހޮސްޕިޓަލްގެ ބިލާ ބެހޭ ގޮތުން ބަހުސްކުރުމަށް ވަގުތު ހޭދަ ކުރާކަމަށް ޕޭޝަންޓުން ބުނެއެވެ. އަދި އެކި ސްކީމްތަކުން އެމީހުންނަށް ބިލްދައްކަން ފައިސާ ހޯދައިދޭ ކަމަށްވެސް އެތައް ބަޔަކު ބުނެފައި ވެއެވެ. އޭނާ ނިޔާވުމަށްފަހު މީހުން ލިޔެފައިވާ ލިޔުންތަކާއި ދައްކާފައުވާ ވާހަކަތަކުގައި ބުނެފައި ވަނީ އޭނާ ބަލި މީހުންނަށް އަމިއްލަ ގެއިން ކާނާވެސް ބައެއް ދުވަސްދުވަހު ގެނަސްދޭ ކަމަށެވެ.
އޭނާ ނިޔާވީ މިދިޔަ މަހުގެ 28 ގައެވެ.
އިންޑިއާގެ ސުޕްރީމް ކޯޓުން ބުނިގޮތުގައި އިހުމާލުން މީހުން މިހާ ގިނަ އަދަދަކަށް މަރުވެގެން މިދަނީ ގަތުލުއާންމެއް ފަދަ ގޮތަކަށެވެ. ބައެއް މީޑިއާގައި ބުނެފައި ވަނީ މިނިވަން އިންޑިއާގައި ދުވަހަކުވެސް ދިމާވެފައި ނުވާފަދަ މި ހިތާމަވެރި ހާދިސާ މެދުވެރި ގޮތާ މެދު ޖުޑީޝަލް ކޮމިޝަނެއް ހަދައިގެން ކަން ހިނގައި ދިޔަ ގިތް ބަލަން ވެއްޖެ ކަމަށެވެ. ޑޮކްޓަރުންނާއި ސައިންޓިސްޓުން ބުނަނީ މިހެން ދިމާވާނެ ކަމުގެ އިންޒާރު ސަރުކާރަށް އެމީހުން ދީފައިވާނެ ކަމަށެވެ. އަދި ސަރުކާރުން އެވާހަކަތައް ބޮލާލައި ޖެހީ ކަމަށެވެ.
