ޗައިނާއާއި ނިއުޒިލެންޑްގެ ދެމެދުގެ މައްސަލަތައް މިހާރު ހައްލުކުރަން އުދަގޫ ވާހިސާބަށް ގޮސްފައިވާ ކަމަށް ނިއުޒިލެންޑްގެ ބޮޑު ވަޒީރު ޖެސިންޑާ އަރޑެން ވިދާޅުވެއްޖެއެވެ. ޗައިނާއަކީ ނިއުޒިލެންޑްގެ އެންމެ ބޮޑު ވިޔަފާރީގެ ބައިވެރިޔާއެވެ.
ނިއުޒިލެންޑުން ޗައިނާއާ ބެހޭ ގޮތުން ސާފު ސިޔާސަތެއް އިޢްލާން ކޮށްފައި ނުވުމުން، ޗައިނާގެ ޖާސޫސީ ހަރަކާތްތަކާ ދެކޮޅަށް މަސައްކަތް ކުރާ "ފައިވް އައި" ފަސް ލޯ، ޖަމާއަތުން ވަނީ ނުރުހުން ފާޅުކޮށްފައެވެ.
އާރޑެން ވިދާޅުވީ، ޗައިނާއާއި ނިއުޒިލެންޑާ ދެމެދުގެ ބައެއް ކަންތައްތަކަކީ، ނިއުޒިލެންޑަށް އެއްބަސް ނުވެވޭނެ ކަންތައްތަކެވެ. އަދި ޗައިނާގެ ވެލިއުތަކާއި ޗައިނާގެ ނިޒާމަކީ ނިއުޒިލެންޑްގެ ނިޒާމާ ތަފާތު ނިޒާމެއް ކަމަށެވެ.
ނިއުޒިލެންޑުން އުފައްދާ މުދަލުގެ ތިންބައިކުޅަ އެއްބައި ގަންނަނީ ޗައިނާއިންނެވެ.
ނިއުޒިލެންޑްގެ އަވަށްޓެރިޔާ، އޮސްޓްރޭލިއާއަކީ މިހާރު ޗައިނާގެ ހަތުރެކެވެ. އަދި އެގައުމުގެ އެހެން ބައިވެރިން ކަމަށްވާ އެމެރިކާއާއި އިނގިރޭސިވިލާތުން ވަނީ ޗައިނާއާ ދެކޮޅަށް ސާފު ސިޔާސަތުތަކެއް އިޢްލާން ކޮށްފައެވެ.
ނިއުޒިލެންޑާއި ނިއުޒިލެންޑްގެ ބައިވެރިންނާ ދެމެދު މައްސަލައަކަށްވެގެން ދިޔައީ ނިއުޒިލެންޑްގެ ޚާރިޖީ ވަޒިރު ޗައިނާއަށް ފަހިވާ ގޮތަށް ވާހަކަ ދެއްކުމުންނެވެ.
އެމެރިކާ، އިނގިރޭސިވިލާތް އަދި އޮސްޓްރޭލިއާއާއި ކެނެޑާ ބައިވެރިވާ ފައިވް އައި ޖަމާއަތުން ބުނަނީ ޗައިނާއިން މިގައުމުތަކުގެ ސަރުކާރާއި ސިނާއީ ދާއިރާއަށް ޖާސޫސް ކުރާ ކަމަށެވެ. އަދި ޗައިނާއާ ދޭތެރޭ ސަމާލު ވާން ޖެހޭނެ ކަމަށެވެ.
މުހައްލިލުން ދެކޭ ގޮތުގައި އާޑެންގެ މި ވާހަކަތައް އައިސްފައިވަނީ ޚާރިޖީ ވަޒީރުގެ ވާހަކައާ ދުރަށް ޖެހިވަޑައިގެން، ނިއުޒިލެންޑް އެހެން ބައިވެރިންނާ އެއްފަދަ ސިޔާސަތެއް ގެންގުޅޭކަން ދެއްކުމުގެ ގޮތުންނެވެ.
ނިއުޒިލެންޑްގެ ޕާލަމެންޓްގައި ހިމެނޭ ކުދަ ޕާޓީއަކުން ވަނީ ޝިންޖިނއާން ގައި ޗައިނާއިން ހިންގަނީ ގަތުލުއާންމެއް ކަމަށް ބަޔާން ކުރުމަށް ޕާލަމެންޓަށް ގަރާރެއް ވައްދާފައެވެ.
