ކޮވިޑް19އާ ގުޅިގެން، މިއަހަރުގެ އީދު ދުވަހު، ޢީދު ނަމާދު، ޔޫއޭއީ އިން ބާއްވާނެ ގޮތުގެ ޕްރޮޓޮކޯލް އެގައުމުން އިޢްލާން ކޮށްފިއެވެ.
- ޢީދު ނަމާދު އޮންނާނީ ޚުތުބާ ހިމެނޭ ގޮތަށް 15 މިނެޓަށް ވުރެން ދިގު ނުވާ ގޮތަށެވެ.
- މީހުން މިސްކިތުގައި ތިބެންވާނީ، ގައި ދުރުކޮށް، މާސްކް އަޅައިގެންނެވެ.
- ކޮވިޑަށް ޕޮޒިޓިވްވެފައިވާ މީހުން ބަލަހައްޓާ އަދި އެފަދަ ފަރުވާ ލިބޭ މީހެއްގެ ކައިރީގައި އުޅޭ މީހުން އީދު ނަމާދަށް ދިއުމަކީ މަނާކަމެއް ކަމަށެވެ.
- ޢީދު ނަމާދަށް ދާ މީހުން އެކަކު އަނެކަކާ ބައްދަލުކޮށް، ސަލާންގަލާން ކުރުމަކީ މަނާކަމެކެވެ.
- ޢީދު ނަމާދު ކުރަން ޖެހޭނީ، އެކަމަށް ހުއްދަ ދީފައިވާ މިސްކިތްތަކާއި ތަންތާނގައެވެ.
- މިސްކިތްތަކުގައި ވުޟޫ ކުރަން ހުންނަ ތަންތަން ބަންދުކޮށްފައި ބަހައްޓަން ވާނެއެވެ.
- އުމުރުން 60 އަހަރުން މަތީ މީހުންނާއި އުމުރުން 12 އަހަރުން ދަށުގެ މީހުން އީދު ނަމާދަށް ދިއުން މަނާވާނެއެވެ.
- ސަލާމަތީ ފަރާތްތަކުން، މީހުން ތޮއްޖެހިޔަ ނުދިނުމަށް، މިސްކިތަށް މީހުން ވަނުމާއި މިސްކިތުން ނިކުތުން ކޮންޓްރޯލް ކުރަން ވާނެއެވެ.
- މިސްކިތްތައް ހުޅުވަން ވާނީ ޢީދު ނަމާދުގެ ފަނަރަ މިނެޓްގެ ކުރިންނެވެ. އަދި އީދު ނަމާދު ނިމުމުން ވަގުތުން މިސްކިތްތައް ބަންދު ކުރަން ވާނެއެވެ.
