މިއަހަރުގެ ފިތުރު ޒަކާތުގެ ގޮތުގައ ގޮވާމުން ބަލައިގެންފައިވާ ތަކެތި މިއަދު އޭގެ ހައްގުވެރިން ކަމަށްވާ ފަގީރުންނާއި މިސްކީނުންނަށް މިއަދު ދޫކުރުމަށް ހަމަޖެހިފައިވާ ކަމަށް މިނިސްޓްރީ އޮފް އިސްލާމިކް އެފެއާޒުން ވިދާޅުވެއްޖެއެވެ.
މި ދުވަސްވަރަކީ ކޮވިޑް-19 ގެ ސަބަބުން މާލޭ ސަރަހައްދުގައި ކާފިއު އިއުލާން ކޮށްފައިވާ ދުވަސްވަރަކަށް ވުމުން ލަސްނުކޮށް ފިތުރުޒަކާތް ބަލައި އައުމަކީ މިނިސްޓްރީގެ ވަރަށް ބޮޑު އެދުމެއް ކަމަށެވެ.
މި އަހަރުގެ ފިތުރު ޒަކާތް ދޫކުރުމަށް ހަމަޖެހިފައިވަނީ މިއަހަރު އަލަށް އެކުލަވައިލެވުނު ފަގީރުގެ ދަފްތަރުގައިވާ މީހުންނަށެވެ. އެފަރާތްތަކަށް ޒަކާތް ދޫކުރެވޭނީ އައިޑީކާޑު ނުވަތަ ޕާސްޕޯޓު ނުވަތަ އުފަން ދުވަހުގެ ސެޓުފިކެޓުގެ އަސްލު ގެންނަ މީހުންނަށް ކަމަށް މިނިސްޓްރީން ވިދާޅުވެފައިވެއެވެ.
ޒަކާތުގެ ގޮތުގައި ގޮވާމުން ބަލައިގެންފައިވާ ތަކެތީ ދޫކުރުމަށް ހަމަޖެހިފައިވަނީ ކީރިތު ޤުރުއާނާބެހޭ ޤައުމީ މަރުކަޒުންނެވެ. ދޫކުރުމަށް ހަމަޖެހިފައިވާ ވަގުތަކީ މިއަދު ހެނދުނު 10:00 އިން މެންދުރުފަހު 3:30 އަށް ކަމަށް އިސްލާމިކް މިނިސްޓްރީން ވިދާޅުވެފައިވެއެވެ.
