އިސްރާއީލުން ފަލަސްތީނުގެ ޣައްޒާއަށް ދެމުންގެންދިޔަ ވަރުގަދަ ޓެރަރިސްޓް ހަމަލާތަކާ ދެކޮޅަށް ޣައްޒާގެ މުޖާހިދުންގެ ޖަމާއަތްތަކުން އިސްރާއީލަށް ދެމުން ގެންދިޔަ ވަރުގަދަ ރައްދު ހަމަލާތަކަށް ކެތްނުވެންގެން އިސްރާއީލުން ހަމަލާތައް ދިނުން ހުއްޓާލަން އެއްބަސްވެ ހަމަލާދިނުން ހުއްޓާލުމުން އިސްރާއީލުގެ މައްޗަށް ފަލަސްތީނު ރައްޔިތުންނަށް ލިބުނު ނަސްރު ފާހަގަކުރަން ފަލަސްތީނުގެ ހުރިހާ ރަށްތަކެއްގައި އާންމުން މަގުތަކަށް ނުކުމެ އުފާފާޅު ކުރަން ފަށައިފިއެވެ.
މިއީ، ފަލަސްތީނަށް މެންދަމުގެ ވަގުތު ނަމަވެސް، ރާމަﷲއާއި، ހުޅަނގު އައްސޭރިއާއި، ގުދުސްގެ އިތުރުން، ޣައްޒާގެ ބައެއް ހިސާބުތަކުގެ މަގުތަކަށް ވެސް އާންމުން ނުކުމެފައިވާ ކަމަށް ޚަބަރު ލިބެއެވެ.
އެގޮތުން، ބައެއް ރަށްތަކުގެ ބޮޑެތި މައިދާންތަކަށް ފަލަސްތީނުގެ އާންމުން ޖަމާވެ، ތަކުބީރުކިޔައި، އިސްރާއީލުގެ އުދުވާނުގެ ކުރިމަތީގައި ފަލަސްތީނު ރައްޔިތުންނަށް މިލިބުނު ނަސްރަށްޓަކައި ﷲއަށް ހަމްދުކޮށް، އަދި އުފާފާޅުކުރަމުން އެބަގެންދެއެވެ.
ޣައްޒާއަށް ދެމުންގެންދިޔަ ހަމަލާތައް ހުއްޓާލުމަށް މިސްރު މެދުވެރިވެގެން ހުށަހެޅި ހުށަހެޅުމަށް މިހާރުވަނީ އަމަލުކުރަން ފެށިފައެވެ.
މިސްރުގެ ހުށަހެޅުމަށް އިސްރާއީލާއި، ހަމާސްއާއި އިސްލާމިކް ޖިހާދުން ވެސް ވަނީ އެއްބަސް ވެފައެވެ.
ޣައްޒާއަށް ދެމުން ގެންދިޔަ ހަމަލާތައް 11 ދުވަސް ފަހުން ހުއްޓާލަން އިސްރާއީލުން އެއްބަސްމިވީ، މުޅި ދުނިޔެ ގޮވާލަމުން ދިޔައިރު ވެސް އެކަން ނުކުރާނޭ ކަމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ބުނަމުން ދިއުމަށް ފަހުގައެވެ.
އިސްރާއީލުގެ އުދުވާނީ ހަމަލާތަކުގައި ޣައްޒާއިން އެތައްބަޔަކު ޝަހީދުކޮށް، އެތައްސަތޭކަ ބަޔަކު ޒަޚަމްކޮށް، ފަލަސްތީނު ރައްޔިތުންގެ އެތައްސަތޭކަ ގެދޮރާއި އިމާރާތްތަކަށް ބޮންއަޅައި ބިމާ ހަމަކުރިއިރު، ޣައްޒާގެ މުޖާހިދުންގެ ޖަމާއަތްތައް ގުޅިގެން އިސްރާއީލަށް ވެސް ވަރަށް ވަރުގަދަ ހަމަލާތަކެއް ދީފައި ވެއެވެ.
މި ހަމަލާތަކުގައި އިސްރާއީލުން މަދުބަޔަކު މަރުވިއެއް ކަމަކު، އިސްރާއީލުގެ ރަށްތަކަށް ހަމަލާތައް އަމާޒުވެ، އުމްރާނީ ބޮޑެތި އެތައް ގެއްލުންތަކެއް ލިބިފައި ވެއެވެ.
ރޮކެޓާއި، މިސައިލް ހަމަލާތައް ގިނަކަމުން އިސްރާއީލުގެ އެއަރޕޯޓްތައް ބަންދުވެ، ވައިގެ މަގު ބަންދުވެ އިގްތިސާދީ ގޮތުންވެސް ބޮޑެތި ގެއްލުންތައް ދިޔައީ ލިބެމުންނެވެ.
ނަތަންޔާހޫއަށް އެންމެފަހުން ގޮތްދޫކުރަން ޖެހުނީ އިސްރާއީލުގެ އެތެރޭގެ ފިއްތުންތައް ބޮޑުވެގެން ކަމަށް ވެއެވެ. ނަތަންޔާހޫ މިވަގުތު ހުރީ އިސްރާއީލުގެ ވަގުތީ ބޮޑުވަޒީރުގެ މަގާމުގައެވެ.
އޭނާ އެއްވެސް ކަމަކާނުލައި ސިފައިން ފޮނުވައިގެން ޣައްޒާއަށް ބޮންއަޅައި، އެތައް ބަޔަކު ޝަހީދުކޮށް ޣައްޒާ ސުންނާފަތި ކުރަން މަސައްކަތް ފެށީ ބޮޑުވަޒީރު ކަމުގެ މަގާމުގެ އެދުމުގައި އިސްރާއީލު މީހުންގެ ތާއީދު އިތުރުކުރުމަށް ކަމަށް ބައެއް ފަރާތްތަކުން ބުނެއެވެ.
