ރެއާލް މެޑްރިޑުގައި 2022 ވަނަ އަހަރުގެ ޖޫން މަހުގެ ނިޔަލަށް މަޑު ކުރުމަށް އެއްބަސްވެ ކްރޭޝިޔާގެ ތަޖުރިބާކާރު މިޑްފީލްޑަރު ލޫކާ މޮޑްރިޗް މިއަދު ކޮންޓްރެކްޓުގައި ސޮއި ކޮށްފިއެވެ.
2012 ވަނަ އަހަރު އިނގިރޭސި ވިލާތުގެ ޓޮޓެންހަމްއިން 43 މިލިޔަން ޑޮލަރަށް ރެއާލްއަށް ބަދަލުވެ ފާއިތުވެދިޔަ 9 އަހަރު ތެރޭގައި މިޑްރިޗް ވަނީ އެކްލަބުން ހޯދި ބޮޑެތި ހުރިހާ ކާމިޔާބެއްގައި މުހިމުއް ދައުރެއް އަދާ ކޮށްފައެވެ. މީގެ ތެރެއިން ޖެހިޖެހިގެން 4 ފަހަރު ޗެމްޕިއަންސް ލީގް ހޯދުމާއި ދެފަހަރު ސްޕެނިޝް ލަލީގާ ކާމިޔާބު ކުރުން ފާހަގަ ކޮށްލެވެއެވެ.
މޮޑްރިޗަކީ ރެއާލްގެ ކޯޗް ޒައިނުއްދީން ޒިދާން އެންމެ އިތުބާރު އެއްކުޅުންތެރިޔާއެވެ. އަނިޔާގެ ސަބަބުން ނިމިދިޔަ ސީޒަނުގެ ކުރީ ކޮޅު ބައެއް މެޗުތައް މޮޑްރިޗަށް ގެއްލުނެވެ. އަދި މޮޑްރިޗް،35، ގެ ފިޓްނަސް ލެވެލްއަށް ބަލައި ރެއާލްއިން ސީޒަން ނިމުމާއެކު ވިއްކާލާނެ ކަމަށް ބެލެވުނެވެ. އެކަމަކު އަނިޔާއިން ސަލާމަތްވެ އައިސް މިޑްރިޗް ވަނީ އޭނާގެ ކުރީގެ ކުޅުން އަލުން ދައްކަން ފަށާފައެވެ.
"އަހަންނަށް އިހްސާސެއް ވަނީ އަހަރެންގެ އުމުރުންވީ 27 އަހަރުހެން. ފިޒިކަލް ކޮންޑިޝަންއާމެދު ވަރަށް ހިތްހަމަ ޖެހިގެން މިހުރީ. އުމުރަކީ ހަމައެކަނި ނަންބަރެއް. އުމުރަށް ބެލުމުގެ ބަދަލުގައި އަހަރެމެން ބަލަން ވާނީ ދަނޑުމަތީގައި ދައްކާ ކުޅުމަށް. އިތުރު ކާމިޔާބީތައް ހޯދުމަށް އެންމެ މަތީ ފަންތީގައި ކުޅުމަށް އަހަރެން މިހުރީ އަދިވެސް ބޭނުންވެފައި" މޮޑްރިޗް ބުންޏެވެ.
