ގުދުސްގައި އެމެރިކާގެ ކޮންސިއުލޭޓް އަލުން ހުޅުވަން ނިންމާފައިވާ ކަމަށް އެމެރިކާގެ ސެކްރެޓަރީ އޮފް ސްޓޭޓް އެންތަނީ ބްލިންކެން ވިދާޅުވެއްޖެއެވެ.
އޭނާ މިކަން ހާމަކުރެއްވީ، ރާމަﷲ ގައި ފަލަސްތީނުގެ ރައީސް މަހްމޫދު އައްބާސްއާ ބައްދަލު ކުރައްވައި ވާހަކަފުޅު ދައްކަވަމުންނެވެ.
ކޮންސިއުލޭޓް އަލުން ހުޅުވުމަކީ، އެމެރިކާއާއި ފަލަސްތީނު ސަރުކާރާ ދެމެދު ސިޔާސީ ގުޅުންތައް އަލުން ގާއިމްވެގެންދާނެ ކަމެކެވެ.
އެމެރިކާއާއި ފަލަސްތީނު ސަރުކާރާ ދެމެދު ސިޔާސީގޮތުންނާއި، އެނޫންވެސް ފަލަސްތީނާ ގުޅޭ ކަންކަމުގައި މުއާމަލާތްތައް މީގެކުރިން ކުރަމުން ގެންގޮސްފައިވަނީ ގުދުސްގައި ހުންނަ އެމެރިކާ ކޮންސިއުލޭޓް މެދުވެރި ކޮށެވެ.
ނަމަވެސް، އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ވެރިކަމުގައި، ގުދުސްއަކީ އިސްރާއީލުގެ ވެރިރަށް ކަމަށް ޓްރަމްޕް ނިންމެވުމުން ފަލަސްތީނު ރުޅިއައިސް ފިޔަވަޅުތަކެއް އެޅުމުން، ޓްރަމްޕްވަނީ ކޮންސިއުލޭޓް ބަންދު ކޮށްފައެވެ.
އަދި ފަލަސްތީނާ ގުޅޭ ކަންކަން ކުރައްވާނީ އެމެރިކާއިން އިސްރާއީލަށް ކަނޑައަޅާފައި ހުންނަވާ އެމްބަސެޑަރު ކަމަށްވެސް ހަމަޖެއްސެވިއެވެ.
ޓްރަމްޕްގެ ވެރިކަމުގައި، މުޅި ގުދުސްއަކީ އިސްރާއީލުގެ ވެރިރަށް ކަމަށް އެމެރިކާއިން ގަބޫލުކުރާ ކަމަށް ކަނޑައަޅައި އިއުލާން ކުރި ނަމަވެސް، ގުދުސްއަކީ އިސްރާއީލުގެ ބިމެއް ނޫންކަމަށް އދއާއި، ބައިނަލްއަގްވާމީ ގާނޫނުތަކުގައި ކަނޑައަޅައި ބަޔާންކޮށްފައި ވެއެވެ.
ގުދުސްއަކީ، 1967 ވަނަ އަހަރު އިސްރާއީލާއި ބައެއް އަރަބި ގައުމުތަކާ ދެމެދު ކުރެވުނު 3 ދުވަހުގެ ހަނގުރާމައިގައި އިސްރާއީލުން ހިފާފައިވާ ރަށެއްކަން ބައިނަލްއަގްވާމީ ގާނޫނުތައް ބުނެއެވެ. އެހެންވެ، އިސްރާއީލުން މިލްކުވެރިކަމަށް ދައުވާ ކުރި ނަމަވެސް، ގުދުސްއަކީ އިސްރާއީލުގެ ބިމެއް ކަމަށް ދުނިޔެ ގަބޫލެއް ނުކުރެއެވެ.
އެމެރިކާގެ މިހާރުގެ ރައީސް ޖޯ ބައިޑެން ވެރިކަމަށް ކުރެއްވި ކެމްޕެއިންގައި ވަނީ، ގުދުސްގައި ޓްރަމްޕް ހުޅުވި އެމެރިކާ އެމްބަސީ އަލުން ތެލްއަވީވަށް ބަދަލު ނުކުރައްވާނޭ ކަމަށެވެ. އޭގެ ބަދަލުގައި، ގުދުސްގައި ފަލަސްތީނަށް އެމްބަސީއެއް ހުޅުވާނީ ކަމަށެވެ.
މިކަމާ ގުޅޭގޮތުން، އެމެރިކާގެ ސެކްރެޓަރީ އޮފް ސްޓޭޓް އެންތަނީ ބްލިންކެން ފަލަސްތީނުގެ ރައީސާ މަޝްވަރާ ކުރެއްވި ނަމަވެސް، ގުދުސްގައި އެމެރިކާގެ ކޮންސިއުލޭޓް ހުޅުވާނީ ސީދާ ކޮން އިރަކު ކަމެއް ވިދާޅެއް ނުވެއެވެ.
ފަލަސްތީނުގެ ރައީސާއެކު ދެއްވި ޖޮއިންޓް ޕްރެސް ކޮންފަރެންސްގައި ބްލިންކެން ވަނީ، ފަލަސްތީނަށް 75 މިލިއަން އެމެރިކާ ޑޮލަރު ދިނުމަށް ސަރުކާރުން ނިންމާފައިވާކަން އިއުލާން ކުރައްވާފައެވެ.
މީގެ ބޭރުން، ޣައްޒާއަށް ކުއްލި އެހީގެގޮތުގައި 5.5 މިލިއަން ޑޮލަރު އަދި ފަލަސްތީނު ރެފިއުޖީންނަށް އެހީވާ އދގެ އޭޖެންސީއަށް 32 މިލިއަން ޑޮލަރު ދިނުމަށް ނިންމާފައިވާ ކަމަށްވެސް އެންތަނީ ބްލިންކެން ހާމަކުރެއްވިއެވެ.
އެމެރިކާގެ ރައީސް ޖޯ ބައިޑެން މިދިޔަ ހަފްތާގައި ވިދާޅުވެފައިވަނީ، ޣައްޒާ އަލުން އާރާސްތު ކުރުމަށް އެމެރިކާއިން އެހީވެދޭނޭ ކަމަށެވެ.
ނަމަވެސް، ޣައްޒާ އަލުން އާރާސްތު ކުރުމުގައި އެމެރިކާއިން ހަމާސްއާ އެއްވެސް މުއާމަލާތެއް ނުކުރާނޭ ކަމަށާއި، އެކަމުގައި އެމެރިކާއިން ބައިވެރި ކުރާނީ ފަލަސްތީނު ސަރުކާރު ކަމަށްވެސް ބައިޑެން ވިދާޅުވިއެވެ.
ޣައްޒާއަކީ ރާމަﷲ ގައި އޮންނަ ފަލަސްތީނު ސަރުކާރުގެ ބާރު ފޯރާ ރަށެއް ނޫނެވެ. 2007 ވަނަ އަހަރުން ފެށިގެން ޣައްޒާގައި ވެރިކަން ކުރަނީ ހަމާސްއިންނެވެ.
