ޕާކިސްތާންގައި ޗައިނާ ލޮނު އުފައްދާ ފަރާތްތަކާ ދެކޮޅަށް ސަރުކާރުން ފިޔަވަޅު އަޅަން ފަށައިފިއެވެ. ޕާކިސްތާންގައި ޗައިނާ ލޮމުގެ ނަމުން މަޝްހޫރުވެފައިވާ މި މާއްދާއަކީ ކާނާ މީރުކޮށް ލުމަށް މީހުން ބޭނުން ކުރާ މާއްދާއެކެވެ. ރާއްޖޭގައި މި މާއްދާ މަޝްހޫރުވެފައި ވަނީ އަޖިނޮމޮތޯގެ ނަމުންނެވެ.
ޕާކިސްތާނު ސުޕްރީމް ކޯޓުން ވަނީ އެކޯޓަށް ލިބުނު ޝަކުވާތަކާ ގުޅިގެން އަޖިނޮމޮޓޯއާ ބެހޭ ގޮތުން ސުއޯމޯޓޯ މައްސަލައެއް ބަލާފައެވެ. ޕާކިސްތާންގެ ޗީފް ޖަސްޓިސް ސާގިބް ނިސާރު ވަނީ ތަޖުރިބާކާރުންގެ ބަސް އެއްސެވުމަށްފަހު، މި އީ ބޭނުން ކުރަން ހެޔޮނުވާ އެއްޗެއް ކަމަށް ނިންމަވައި ޙުކުމް ކުރައްވާފައެވެ.
އަޖިނޯމޮތޯ ނުވަތަ ޗައިނާ ސޯލްޓަކީ، މޮނޮސޯޑިއަމް ގުލުޓޮމޭޓް (އެމްއެސްޖީ)ގެ މާއްދާ ހިމެނޭ އެއްޗެކެވެ. ބާޒާރުން ގަންނަ ބައެއް ބާވަތްތަކުގައި ސިއްޙީ އިރުޝާދު ދީފައި ހުންނަ އިރު، އޭގައި އެމްއެސްޖީ ނެތްކަން ކަށަވަރު ކޮށްދީފައި ވާނެއެވެ.
ނަމަވެސް ބައެއް ހޭލުންތެރިކަން ކުޑަ ކުދި ގައުމުތަކާއި އާބާދީތަކުގައި ސިއްޙަތާ ބެހޭ މަސްލޫފަރާތްތަކުގެ ވެސް ހޭލުންތެރިކަން ކުދަ ކަމުން އެމްއެސްޖީ ފަދަ ނުރައްކާތެރި ބާވަތްތަކާ އަޅާނުލައި ދޫކޮށްލެވިފައި ވެއެވެ.
އެމްއެސްޖީއަކީ އެމެރިކާގައި އެއްވެސް މިންވަރަކަށް އެއްވެސް ހާލަތެއްގައި ބޭނުން ކުރުން މަނާ ބާވަތެކެވެ.
ޕާކިސްތާންގެ ނޯޝޭރާ ސަރަހައްދުގައި ފުލުހުން ވަނީ ޗައިނާ ސޯލްޓް އެމްއެސްޖީ އުފައްދާ ފަރާތްތަކާ ދެކޮޅަށް ފިޔަވަޅު އަޅަން ފަށާފައެވެ. އިއްޔެވެސް ގިނަ އަދަދެއްގެ ލޮނު ވަނީ ހިފަހައްޓާފައެވެ. އަދި ފުލުހުން ވަނީ ހޮޓްލައިނެއް ހަދައި މަޢްލޫމާތު ހިއްސާ ކުރުމަށް ރައްޔިތުންގެ ކިބައިން އެދިފައެވެ.
ޕަންޖާބް ފުޑް އޮތޯރިޓީން ވަނީ ޖެނުއަރީ މަހުން ފެށިގެން އަޖިނަމޮޓޯ އުފެއްދުމާއި ވިއްކުން މަނާ ކޮށްފައެވެ.
