ސްޓޫޑެންޑް ލޯނުތައް ދެއްކުން ފަސްކޮށްދީފިއެވެ.
ކޮވިޑް-19 އާ ގުޅޭ ގޮތުން، ރައީސް އިބްރާހިމް މުހައްމަދު ސޯލިހު މިއަދު ބޭއްވެވި ހާއްސަ ނިއުސް ކޮންފަރެންސްގައި ވާހަކަފުޅުދައްކަވަމުން އެމަނިކުފާނު ވިދާޅުވީ ސްޓޫޑެންޑް ލޯނުތައް ދެއްކުން މިއަހަރުގެ ނިޔަލަށް ފަސްކޮށްދޭން ނިންމާފައިވާ ކަމަށެވެ.
ކޮވިޑްގެ ނުރައްކާ މިދިޔަ އަހަރު ބޮޑުވެގެންދިޔައިރު ވެސް ސަރުކާރުން ވަނީ ސްޓޫޑެންޓް ލޯނު ދެއްކުން އެ އަހަރުގެ ނިޔަލަށް ފަސްކޮށްދީފައެވެ.
ސްޓޫޑެންޓް ލޯނުތައް ދެއްކުން ފަސްކޮށްދިނުމުގެ އިތުރުން ސަރުކާރުން މިހާރު ވަނީ މި މަހުގެ ގޭބީސީތަކުގެ ފެން ބިލުން 30 ޕަސެންޓް ޑިސްކައުންޓް އަދި ވިޔަފާރި ކުރާ ތަންތަނުގެ ފެންބިލުން 20 ޕަސެންޓްގެ ޑިސްކައުންޓެއް ދިނުމަށް ނިންމާފައެވެ. އަދި ގޭބެސީތަކުގެ ކަރަންޓް ބިލުން 40 ޕަސެންޓްގެ ޑިސްކައުންޓެއް، ވިޔަފާރިތަކުން 20 ޕަސެންޓްގެ ޑިސްކައުންޓެއް ދިނުމަށް ވެސް ވަނީ ނިންމާފައެވެ.
މި ޑިސްކައުންޓްތައް އަދި ދޭން ނިންމާފައިވަނީ މި މަހު އެކަނި ކަމަށްވީ ނަމަވެސް ހާލަތަށް ބަލައި އެކަމަށް ބަދަލު ގެންނަވާނެ ކަމަށް ރައީސް ވިދާޅުވިއެވެ.
