ޖޮނަތަން ޕޮލާޑަކީ އެމެރިކާގެ ނިއުކްލިއަރ ޓެކްނޮލޮޖީ އިޒްރޭލަށް ޖާސޫސްކޮށްދިން އެމެރިކާ މީހެކެވެ. އޭނާ އަކީ 30 އަހަރަށް ޖަލަށް ލާން ކުރި ޙުކުމްފުރިހަމަ ކުރުމަށްފަހު އޭނާ ވަނީ މިނިވަން ވެފައެވެ. ޕޮލާޑް ވަނީ ޕްރައިވެޓް ޖެޓެއްގައި އިޒްރޭލަށް އައިސްފައެވެ.
ބެން ގޫރިއޮން އެއަރޕޯޓަށް އޭނާ އުފުލި ޕްރައިވެޓް ޖެއްސިއިރު އޭނާގެ އިސްތިގްބާލުގައި ހުރީ އިޒްރޭލުގެ ބޮޑު ވަޒީރު ބެން ނަތަންޔާހޫއެވެ. ޕޮލާޑްއާއި އޭނާގެ އަންހެނުން ވަގުތުން ބިމަށް ތިރިވެ ބޮސް ދިނެވެ.
މިހާރު ތިހިރީ އަމިއްލަ ވަޒަނުގައި ކަމަށް ބުނެ ނަތަންޔާހޫ އޭނާއަށް މަރުޙަބާ ކިޔަމުން، އެއާޕޯޓުން ޕޮލާޑާ އިޒްރޭލުގެ ރަށްވެހި ކަމުގެ ކާޑެއް ހަވާލު ކުރިއެވެ.
އުމުރުން 66 އަހަރުގެ ޕޮލާޑު ޖަލުން ދޫކޮށްލާފައި ވަނީ ހަރުކަށި ޕެރޯލް ގަވާއިދެއްގެ ދަށުން 2015 ގައެވެ. އިޒްރޭލަށް އެމެރިކާގެ ޓެކްނޮލޮޖީ ޖާސޫސް ކޮށްދިން ޕޮލާޑް މިނިވަން ކުރުމަށް އެމެރިކާގެ ކޮންމެ ރައީސެއް ގާތުން އިޒްރޭލުން އެދެމުން ދިޔައެވެ.
ޕޮލާޑް ޖަލަށް ލުމުގެ ކުރިން އޭނާ ހުރީ އެމެރިކާގެ ކަނޑުގެ ސިފައިންގެ ވަޒީފާގައެވެ. ތަހުގީގަށް އެފްބީއައި އިން ސާބިތުކޮށްދިން ގޮތުގައި ޕޮލާޑް ވަނީ 17 އަހަރު ވަންދެން އެމެރިކާގެ މައްލޫމާތު އިޒްރޭލަށް ޖާސޫސްކޮށްދީފައެވެ.
އެމެރިކާގެ ގާނޫނުގައި މުޖުރިމެއްކަމަށް ކަނޑައެޅި ޕޮލާޑަކީ އިޒްރޭލު މީހުންނަށް ބަތޮލެކެވެ. ނަތަންޔާނޫ ވަނީ އިޒްރޭލުގެ މޮސާދްގެ އެޖެންޓުންނަށް އޮންނަ ވަރުގެ ޕެންޝަނެއްވެސް ޕޮލާޑަށް ހަމަޖައްސައިދީފައެވެ.
އިޒްރޭލްގެ ކުރީގެ ބޮޑު ވަޒީރު އެހޫދު އޮލްމާތު ވިދާޅުވިގޮތުގައި ޕޮލާޑަށް އިޒްރޭލުން ބަތޮލެއްގެ ދަރަޖަ ދޭކަށް ނުޖެހެއެވެ. އޭނާގެ މަސައްކަތަށް އިޒްރޭލުން އޭނާއަށް ފައިސާ ދީފައި ވާނެ ކަމަށް އޮލްމާތު ވިދާޅުވިއެވެ.
