ދުނިޔޭގައި ފެތުރެމުންދާ ވާލު ރޯގާ އުފެދިގެން އައި ގޮތާ ބެހޭ ގޮތުން ހޯދުމަށް ބާރުއަޅައި ޔޫރަޕްގެ އިއްތިހާދުން ވާހަކަ ދައްކައިފިއެވެ. އިނގިރޭސިވިލާތާއި އެމެރިކާއިން ވެސް ދަނީ މެދު ނުކެނޑި މި ވަބާ އުފެދިގެން އައި ގޮތް ހޯދަން ޖެހޭނެކަމަށް ގޮވާލަމުންނެވެ.
ޔޫރަޕްގެ ޖަމާއަތުގެ ރައީސް އުރްސުލާ ވެން ޑި ލިޔެން އިއްޔެ ވިދާޅުވީ މި މައްސަލަ އަލުން ތަހުގީގު ކުރުމަށްޓަކައި މި ކަމާ ގުޅުން ހުރި ހުރިހައި ތަންތަނަކަށް ވަނުމަށް ފުރުސަތު ލިބެން ޖެހޭނެކަމަށެވެ.
ސީނު ކަރައިން އުފެދިގެން އައި ވާލު ރޯގާ 200 މިލިއަނެއްހައި މީހުންނަށް ޖެހި، ހަތަރު މިލިއަނެއްހައި މީހުން މަރުވެފައި ވެއެވެ.
ޖީ7ގެ ގައުމުތަކުގެ ވެރިންގެ މަހާސިންތާގައިވެސް މިމައްސަލައަށް ވާހަކަ ދެކެވޭނެ ކަމަށް ބެލެވެއެވެ.
ޔޫރަޕްގެ ޖަމާއަތުން ބުނިގޮތުގައި އެޖަމާއަތުގެ އަމިއްލަ ޖާސޫސީ މަޢްލޫމާތު ހޯދުމުގެ ނިޒާމެއް ނެތުމުން އެމަޢްލޫމާތު ހޯދާނީ ގައުމުތަކާ ގުޅިގެން އެމެރިކާގެ ޖާސޫސީ އިދާރާ މެދުވެރިކޮށެވެ.
އެމެރިކާގެ ރައީސް ޖޯ ބައިޑެން ވަނީ އެމެރިކާގެ ޖާސޫސީ އިދާރާއަށް ކަމާ ގުޅުން މަޢްލޫމާތު އެއްކުރުމަށް އަންގަވާފައެވެ. އަދި 90 ދުވަސްތެރޭގައި އޭނާއަށް މައްސަލައިގެ ރިޕޯޓެއް ދިނުމަށްވެސް އަންގަވާފައެވެ.
ބައިޑެންގެ މި އެންގެވުން އައީ ވޫހާންގެ ލެބޯޓްރީގައި 2019 ނޮވެމްބަރު މަހު ތިން މީހަކު ބަލިވިކަމުގެ ރިޕޯޓާ އެކުގައެވެ.
ދުނިޔޭގެ ސިއްހަތު ޖަމުއިއްޔާއިން ވަނީ ވޫހާނަށް ކޮމިޝަނެއް ފޮނުވާފައެވެ. ނަމަވެސް ވޫހާންގެ ލެބްޓްރީގެ ބައެއް ތަންތަން އެފަރާތްތަކަށް ނުދެއްކުމާއި ހަސްފަތާލްތަކުގެ ފައިލްތައް ސިއްރު ކުރުމުގެ ސަބަބުން އެފަރާތުން ނެރެފައި ވަނީ ފުރިހަމަ ނޫން ރިޕޯޓެކެވެ.
އެމެރިކާގެ ވައިޓްހައުސްގެ ސިއްޙަތާ ބެހޭ މުސްތަޝާރު ޑރ. އެންތޮނީ ފައުޗީ އިސްވެ ހުންނަވާ ވައިރަސް ތަހުލީލުކުރާ އިދާރާއިން ކޮރޯނާ ވައިރަސްއާ ގުޅޭ ދިރާސާ ހެދުމަށް ދިން ފައިސާ ލިބިގަތް ސައިންޓިސްޓް ޕީޓާރ ޑެޒާކްވެސް މި ވަފްދުގައި ހިމެނުނެވެ. ޑެޒާކަކީ ވާލު ރޯގާގެ ވައިރަސްއަކީ، ލެބަކުން އުފައްދާފައިވާ ވައިރަސްއެއް ނޫން ކަމަށް ވާހަކަ ފަތުރާ ސައިންޓިސްޓެކެވެ. މިއާ ޚިލާފަށް އިންޑިއާ ސައިންޓިސްޓުން ބުނާ ގޮތުގައި ގުދުރަތީ ކޮރޯނާ ވައިރަސްގައި ހުންނަ ވައިރަސްއަކީ ފުއްޕާމޭގެ ސެލްތަކުގައި ގަދައަށް ތައްލަވާ ވައްތަރެއް ނޫނެވެ. އަދި މިހާރު ފެންނަން ހުރި ވައިރަސްއަށް ޕުއްޕާމޭގައި ތަތްލެވުމަށް އިތުރު ދަތްގަނޑުތަކެއް ލެބޯޓްރީގައި އިތުރު ކޮށްފައިވާ ކަމަށެވެ.
