ޗައިނާގެ ޝިންޖިއާންގައި ޗައިނާއިން މުސްލިމުން ބަންދުކޮށްގެން ގެންގުޅޭ ހުރަގެތަކުގެ މަޢްލޫމާތު، މީޑިއާއަށް ހާމަ ކުރި އިންވެސްޓިގޭޓިވް ޖަރނަލިސްޓް، އިންޑިއާ ދަރިކޮޅުގެ ނޫސްވެރިޔާ މެގްހާ ރާޖާގޯޕާލަންއަށް ޕުލިޓްޒަރ ޕްރައިޒް ލިބިއްޖެއެވެ. ރާޖާގޯޕާލަން އަކީ ބަޒްފީޑްގެ ނޫސްވެރިއެކެވެ.
މިއީ އިންޓަރނޭޝަނަލް ރިޕޯޓިންގެ ދާއިރާއިން މިއަހަރު އިނާމު ލިބުނު ނޫސްވެރިޔާ އެވެ.
2017ގައި ސީނުކަރައިން މުސްލިމުން ހުރަގެއަށް ލާން ފެށި ދުވަސްވަރު އޭނާއަށް ހުރެވުނީ ޗައިނާގައެވެ. އެންމެ ފުރަތަމަ ނޫސްވެރިއަކަށް ޝިންޖިއާން އަށް ދިޔަ ބޭރުގެ ނޫސްވެރިއަކީ ރާޖާގޯޕާލަން އެވެ. އަދި މުސްލިމުން ބަންދު ކުރާ ހުރަގެއަކަށް ވަން ހަމައެކަނި ބޭރުގެ ނޫސްވެރިއަކީވެސް އޭނާ އެވެ. އެއިރު ޗައިނާއިން ވަނީ މުސްލިމުން ބަންދުކޮށްގެން ގެންގުޅެން އެފަދަ ތަންތަން ހަދާފައެއް ނުހުންނާނެ ކަމަށް ބުނެފައެވެ.
ރާޖާގޯޕާލަން މި މައްސަލަ އިތުރަށް ކޮންނަން އުޅުމުން، ސީނުކަރައިން އޭނާ ބޭރުކޮށްލިއެވެ. އަދި އޭނާއަށް ވިޒާ ނުދޭން ނިންމިއެވެ.
ޗައިނާއިން އެޅި ފިޔަވަޅުތަކަށް ފަހު ލަންޑަންއިން އިން މަސައްކަތް ކުރާ ރާޖާގޯޕާލަން ވަނީ ހުއްޓައި ނުލައި އެހެން ދެ މީހަކާ ގުޅިގެން އިތުރަށް މައްސަލަ ދިރާސާ ކޮށްފައެވެ. އޭނާއާ ބައިވެރިވި އެކަކަކީ، ސެޓެލައިޓް ފޮޓޯތައް ބޭނުންކޮށްގެން އިމާރާތްތައް ދަނެގަނެ، ފޮރެންސެކް ތަހުލީލުތައް ހަދާ މީހެކެވެ. ދެވަނަ މީހާއަކީ، ނޫސްވެރިންނަށް ޑޭޓާ މޮޑެލިން ހަދައިދޭ ޕްރޮގްރާމަރެކެވެ.
މިތިން މީހުންވެގެން ތަހުލީލުކޮށްފައިވާ ޑޭޓާއަކީ، އަވަށްޓެރި ސްރީލަންކާ ވަރުގެ 23 ގައުމެއް އެއްކޮށްލުމުން ޖެހޭވަރުގެ ބިމުގެ ސަރަހައްދެއްގެ މަންޒަރުތަކުގެ ޑޭޓާއެވެ. އަދި މިމީހުން މި ސަރަހައްދުގެ ފަންސާސްހާސް ތަނެއްގެ ސެޓެލައިޓް ފޮޓޯތައް ދިރާސާ ކުރިއެވެ. މި ދިރާސާތަކަށްފަހު މިމީހުންނަށް ފާހަގަވީ، މީހުން ބަންދު ކުރުމަށް ތައްޔާރުކޮށްފައިވާ ސަލާމަތީ ފިޔަވަޅު ވަރުގަދަ ކޮށްފައިވާ 260 ސްޓްރަކްޗަރއެއް ޝިންޖިއާން ގައި ހަދާފައިވާ ކަމަށެވެ. މިއިން އެންމެ ކުޑަ ތަނުގައިވެސް ދިހަ ހާހެއްހައި މީހުން ބަންދުކޮށްފައިވާ ކަމަށް އެމީހުން ތަހުލީލު ކުރި މަޢްލޫމާތުން އެނގުނެވެ.
މި މަޢްލޫމާތު އިތުރަށް ސައްހަ ކުރުމަށްޓަކައި ރާޖާގޯޕާލަން، ކަޒަޚިސްތާނަށް ގޮސް އެތާގައި ހިމާޔަތް ހޯދައިގެން އުޅޭ ޝިންޖިއާން މުސްލިމުން ހޯދައިގެން އެމީހުން އަތުން މަޢްލޫމާތު ހޯދިއެވެ. މި މީހުންގެ ތެރޭން އޭނާއާ ވަހަކަ ދައްކައި މަޢްލޫމާތު ދިން އެތައް ދޮޅަސް މީހުންނަކީ، މިހުރަގެ ތަކުގައި ކުރިން ބަންދުކޮށްގެން ގެންގުޅުނު މީހުންނެވެ.
ނޫސްވެރިކަމުގެ މޮޅު ލިޔުންތަކަށް އަހަރަކު ދޭ ޕުލިޓްޒަރގެ އިނާމަކީ، 20 ކެޓަގަރީއަކަށް ކޮންމެ އަހަރަކު ދޭ އިނާމެކެވެ.
