ޕާކިސްތާންގެ ސިންދު ޕްރޮވިންސާ މެދު މަރުކަޒީ ސަރުކާރުން ތަފާތު ކުރާކަމަށް ޗީފް މިނިސްޓަރު ވިދާޅުވިތާ ގިނަ ދުވަހެއް ނުވެ ސިންދުގެ ވެރިރަށް ކަރާޗީ، ފެނަށް ޖެހިއްޖެއެވެ.
ސިންދުގެ ފެނާ ބެހޭ ވަޒީރު ވިދާޅުވާ ގޮތުގައި ކަރާޗީ ފެނަށް ޖެހެން މެދުވެރިވީ، ކޯރު ފެނުން ކަރާޗީއަށް ލިބެންވާ މިންވަރަށް ފެން ނުލިބުމުންނެވެ.
ވަޒީރު ވިދާޅުވިގޮތުގައި އޭނާ ވަނީ ކަރާޗީ ފެނަށް ޖެހުމާ ގުޅިގެން ކްލިޕްޓަންއަށް ވަޑައިގެން ވަލީވެރިޔާ އަބްދުﷲ ޝާހް ޣާޒީގެ ޒިޔާރަތަށް ނަދުރެއްވެސް ވިދާޅުވެފައެވެ. އަދި ދަންނަބޭކަލުން އިސްތިސްގާ ނަމާދު ކުރައްވައިފައިވާތީ އެބޭފުޅުންނަށްވެސް އޭނާ ޝުކުރު ދެންނެވިއެވެ.
ވަޒީރު ވިދާޅުވިގޮތުގައި ސިންދު ފެނަށް ޖެހުމުގެ އިތުރުން، މަރުކަޒީ ސަރުކާރުން ވަނީ ކަރަންޓާއި ގޭސް ލިބި ދިނުމުގައިވެސް ސިންދު ޕްރޮވިންސާ މެދު ތަފާތު ކުރުމެއް ގެންގުޅެފައެވެ.
