ޗައިނާއާ ދެކޮޅުވެރި ޝުއޫރުތައް ކަޒަޚިސްތާންގައި ބައްޓަން ވަމުން ދަނީ ކަޒަޚިސްތާންގެ އިދިކޮޅު ސިޔާސީ ފަރާތްތަކުން ސަރުކާރާ ދެކޮޅަށް ރައްޔިތުންގެ ތާއީދު ހޯދުމުގައެވެ. ޗައިނާއާ ދެކޮޅަށް ފާޅުކުރާ ޝުއޫރުތަކަކީ ބައެއް ފަހަރު، ކަޒަޚިސްތާން ސަރުކާރުން ހިތްވަރު ދޭ ކަންތައްތައް ވެސް މެއެވެ.
ޗައިނާގެ އިރުމަތީ އަވަށްޓެރިޔާ އަކީ ޗައިނާއިން އިންވެސްޓް ކުރަން ބޭނުންވާ ގައުމެކެވެ. ޗައިނާއިން ބޭނުން ވަނީ ޗައިނާގެ 55 ފެކްޓްރީއެއް ކަޒަޚިސްތާނަށް ބަދަލު ކުރާށެވެ. މިއީ ކުރިން ޗައިނާގައި ބޭނުން ކޮށްފައިވާ ދުވަސްވީ ފެކްޓްރީ ތަކެވެ. ޗައިނާއިން ބުނަނީ މިއިން ވަޒީފާތައް އުފެދިގެން ދާނެ ކަމަށެވެ.
ކަޒަޚިސްތާންގެ މުއްސަނދި ދަނޑު ބިންތައް ގަންނަން ޗައިނާއިން ބޭނުން ވެއެވެ.
ކަޒަޚިސްތާނަށް ފަސްވަނައަށް އެންމެ ގިނައިން ލޯން ދީފައިވާ ފަރާތަކީ، ޗައިނާއެވެ.
ރައްޔިތުން ބޭނުން ވަނީ ކަޒަޚިސްތާންގައި ޗައިނާގެ ނުފޫޒު ކުދަ ކުރާށެވެ. ދަނޑު ބިންތައް ޗައިނާއަށް ވިއްކުމުގެ ވާހަކަ ދެކެވި ރައްޔިތުން އެކަމާ ދެކޮޅު ހެދުމުން ކަޒަޚިސްތާނުން ވަނީ ބިދޭސިންނަށް ބިން ވިއްކުން މަނާކުރާ ގާނޫނެއް ފާސްކޮށްފައެވެ.
ކަޒަޚިސްތާނަކީ ޗައިނާގެ ބެލްޓް އެނޑް ރޯޑް ޕްރޮޖެކްޓްތައް ހިންގާ ގައުމެކެވެ. އަދި ޝެންހާއީ ކޯރޕަރޭޝަން ޖަމާއަތުގެ މެމްބަރެއްވެސް މެއެވެ.
މިހުރިހައި ކަމަކާއެކު ކަޒަޚިސްތާންގައި ޗައިނާއާ ދެކޮޅަށް އެންމެ ބޮޑަށް ނުރުހުން ފާޅު ކުރަމުންދާ މައްސަލައަކީ ޝީންޖިއާންގެ މައްސަލައެވެ. ޗައިނާއިން ޝިންޖިއާން ގައި ކަންކުރަމުންދާ ގޮތުން ކަޒަޚިސްތާން ރައްޔިތުން ޗައިނާއަށް ނަފްރަތު ކުރެއެވެ.
ކަޒަޚިސްތާންގެ ސަރަހައްދުން ބައެއް ޗައިނާއިން ދަމައިގެންފާނެ ކަމުގެ ބިރަކީވެސް ކަޒަޚިސްތާނުން އަބަދުވެސް ފާރައަށް އޮންނަ ކަމެކެވެ. ކަޒަޚިސްތާން ސަރުކާރު މީޑިއާއިންވެސް ރިޕޯޓް ކޮށްފައިވާ ގޮތުގައި ޗައިނާގެ ފޮރިން މިނިސްޓްރީން ކަޒަޚިސްތާންގެ ބިމުން ބައެއް ހިފުމަށޑް ވާހަކަ ދެއްކުމުން އެކަމާ ކަޒަޚިސްތާން ފޮރިން މިނިސްޓްރީން ދެކޮޅު ހަދާފައި ވެއެވެ.
ކަޒަޚިސްތާންގެ ސަރުކާރާ ދެކޮޅުވެރިން ބުނާ ގޮތުގައި ޗައިނާގެ ނުފޫޒަކީ ވަރަށް ސީރިއަސްކޮށް ވިސްނަން ޖެހޭ ނުފީޒެކެވެ. އަދި ޗައިނާއަކީ ކަޒަޚިސްތާނަށް އަތް ގަދަ ކުރަން ތައްޔާރަށް އޮތް ބިރެއްކަމަށެވެ.
