ކޮވިޑް19އާ ގުޅިގެން ގައުމުތަކުގެ ސިއްޙަތާ ބެހޭ އިންފްރާސްޓްރަކްޗަރ އިމްތިހާނު ކުރެވުނެވެ. އިންޑިއާއަކީ މި ގޮތުން އަޖުމަ ބެލުނު، ވަގުތުން ވަގުތަށް އސްލާހު ބޭނުންވާ ނިޒާމެއް އޮތް ގައުމެއް ކަން ފާހަގަ ކުރެވުނެވެ.
ހެލްތު މިނިސްޓަރަކަށް އަންހެން ބޭފުޅަކު ހުންނެވި ކެރެލާ ސްޓޭޓް ފިޔަވައި އިންޑިއާގައި ހުރިހައި ސްޓޭޓެއް އޮކްސިޖަންއަށް ޖެހުނެވެ.
އިންޑިއާ ސަރުކާރުން ވަނީ ސިއްޙީ ދާއިރާއަށް ޚާއްސަ އިންވެސްޓްމެންޓްތައް ހޯދައިދޭން ފަށާފައެވެ. މީގެ ކުރިންވެސް އަމިއްލަ ކްލިނިކް ތަކާއި ހަސްފަތާލުތަކަށް އޮކްސިޖަން ޕްލާންޓްތައް ހެދުމަށާއި އައިސީޔޫ ގާއިމް ކުރުމަށް ލޯންތައް ދީފައި ވެއެވެ.
އިންޑިއާގެ ހެލްތު މިނިސްޓްރީން ބުނާގޮތުން މުޅި ގައުމުގެ ހެލްތު އިންފްރާސްޓްރަކްޗަރ ވަރުގަދަ ކުރުމަށްޓަކައި އިންޑިއާއިން 6.8 ބިލިއަން ޑޮލަރު އިންވެސްޓް ކުރުމަށް ވަނީ ނިންމާފައެވެ. މިފައިސާއަކީ ރިޒާވް ބޭންކުން ދޫކުރާ މަރުކަޒީ ސަރުކާރުން ގެރެންޓީ ދޭ އަމިއްލަ ހަސްފަތާލް ތަކާއި ރަށްފުށުގެ ހަސްފަތާލްތަކުގައި ފަރުވާގެ ނިޒާމު ހަރުދަނާ ކުރުމަށް ދޭން ލޯންތަކެވެ.
