ސްރީލަންކާގައި އިއާދަ ކުރަނިވި ހަކަތައިގެ ދާއިރާއަށް އެހީތެރިވާން އިންޑިއާއިން ނިންމައިފިއެވެ. ސްރީލަންކާގެ ރައީސް ގޯތާބަޔާ ރާޖަޕަކްސަގެ ވައުދަކީ، 2030އާ ހަމައަށް ލަންކާގެ ހަކަތަ އުފެއްދުމުގެ 70 އިންސައްތަ އިއާދަ ކުރަނިވި ހަކަތައަށް ބަދަލު ކުރާށެވެ.
އިންޑިއާއިން ވަނީ އިރުގެ އަވިން ހަކަތަ އުފެއްދުމަށްޓަކައި 100 މިލިއަން ޑޮލަރުގެ ކްރެޑިޓް ލައިނެއް ސްރީލަންކާއަށް ދީފައެވެ. ސްރީލަންކާގެ ރައީސްގެ އޮފީހުގައި އޮތް ރަސްމިއްޔާތުގައި އިންޑިއާގެ އެކްޒިމް ބެންކާއި ސްރީލަންކާއާ ދެމެދު ވަނީ އެއްބަސްވުމުގައި ސޮއިކޮށްފައެވެ.
ސްރީލަންކާއިން ބުނިގޮތުގައި މިފައިސާ ބޭނުން ކުރުމަށް ހަމަޖެހިފައި ވަނީ، ފުރާޅުމަތީގައި ޕެނަލް ބަހައްޓައިގެން އިރުގެ އަވިން ހަކަތަ ލިބިގަތުމަށެވެ. ސްރީލަންކާއަކީ އިންޓަރނޭޝަނަލް ސޯލާ އެލައެންސްގެ 89 ގައުމުގެ ތެރޭން މެމްބަރެކެވެ.
އިންޑިއާގައި އިރުގެ އަވިން ހަކަތަ އުފެއްދުމުގެ މަސައްކަތުގައި އިސްވެ އުޅެނީ ނޭޝަނަލް ސޯލާ މިޝަން އިންނެވެ. 2014ގައި އިންޑިއާއިން އިރުގެ އަވިން އުފެއްދީ 2.6 ގިނަ ވޮޓްއެވެ. 2021ގައި 34.6 ގިގަ ވޮޓްގެ ކަރަންޓް އިންޑިއާގައި އުފައްދާނެ ކަމަށް ވެއެވެ.
