ފަލަސްތީން ފުލުހުން އަނިޔާކޮށްގެން މަރާލި ނިޒާރު ބަނާތުގެ މަރުގެ މައްސަލަ ތަހްގީގު ކުރުމަށް ގޮވާލަމުން ސިޔާސީ ކުށްވެރިން ފަލަސްތީނު ޖަލުތަކުގައި އަނިޔާ ކުރާ މައްސަލަ ދުނިޔެއިން ކުށްވެރި ކޮށްފިއެވެ. ނިޒާރު ބަނާތަކީ، ފަލަސްތީންގެ ސަރުކާރުގައި ހިނގަމުންދާ ކޮރަޕްޝަންގެ މައްސަލަތަކާ ދެކޮޅަށް ވާހަކަ ދައްކާ މީހެކެވެ. އޭނާ ޖަލަށް ލާފައި ވަނީ، ފަލަސްތީނާއި އިޒްރޭލާއެކު ވެކްސިންއާ ބެހޭ ގޮތުން ސޮއިކޮށްފައިވާ އެއްބަސްވުމުގައި ކޮރަޕްޝަން ހިމެނޭ ކަމަށް ތުހުމަތުކޮށް ވީޑިއޯއެއް މެދުވެރިކޮށް އެވާހަކަ ފެތުރި ފަހުންނެވެ.
މަހްމޫދު އައްބާސްގެ ފަލަސްތީންގެ ސަރުކާރަކީ ޖަލުގައި ސިޔާސީ ކުށްވެރިންނަށް އަނިޔާ ކުރުން އާންމު ތަނެއް ކަމަށްވެސް އިންސާނީ ހައްގުތަކަށް މަސައްކަތް ކުރާ ފަރާތްތަކުން ބުނެއެވެ.
ޙަމާސް އިންވެސް ވަނީ ފުލުހުންގެ ބެލުމުގެ ދަށުގައި ހުއްޓައި ބަނާތު މަރުވި މައްސަލަ ކުށްވެރިކޮށްފައެވެ. އެމެރިކާއާއި ވިލާތު އިއްތިހާދާއި ހިއުމަން ރައިޓްސް ވޮޗްއިންވެސް ވަނީ މިކަން ކުށްވެރިކޮށް، މިފަދަ ކަންކަން ތަކުރާރު ނުކުރުމަށް ފަލަސްތީން ސަރުކާރަށް ބާރުއަޅާފައެވެ. އަދި މިކަން އިންސާފުވެރިކަމާއެކު ތަހުގީގު ކުރުމަށްވެސް ގޮވާލާފައެވެ.
ފަލަސްތީނުން ވަނީ ޖަސްޓިސް މިނިސްޓަރު އިސްވެ ހުންނަވައިގެން މި މައްސަލަ ތަހްގީގުކުރުމަށް ކޮމިޓީއެއް އެކުލަވާލާފައެވެ. މިކޮމިޓީގައި އިންސާނީ ހައްގަށް މަސައްކަތް ކުރާ ފަރާތްތަކުން ބައިވެރި ވުމަށްވެސް އޭނާ ވަނ ދައުވަތު ދެއްވާފައެވެ.
މީޑިއާއިން ރިޕޯޓް ކުރާ ގޮތުން މިހާތަނަށް ލިބިފައި ހުރި މަޢްލޫމާތުން ދޭހަވަނީ ފަލަސްތީން ފުލުހުން ޖަލުގައި އޭނާގެ ގައިގައި ތަޅައި އަނިޔާކޮށްފައިވާ ކަމަށެވެ. އޭނާ މަރުވެފައި ވަނީ ހައްޔަރު ކުރިތާ ގަޑިއެއްގެ ތެރޭގައި ބުރާސްފަތި ދުވަހުއެވެ.
ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ބަނާތުގެ ހަށިގަނޑު ބެއްލެވި ޑޮކްޓަރ ސަމީރު އަބޫ ޒަޢްޒޫރު ވިދާޅުވީ މައްޔިތާގެ މެއަށާއި ކަރަށާއި ކަނދުރާއަށާއި އަދި ބޮލަށާއި ހަށިގަނޑުގެ ތިރިއަށް ބޮޑެތި އަނިޔާތަކެއް ލިބިފައި ހުރި ކަމަށެވެ.
އޭނާގެ އާއިލާގެ މީހަކު ބުނިގޮތުގައި އޭނާ ހައްޔަރު ކުރަން ގެއަށް އައިސްވެސް ފުލުހުން ވަނީ އޭނާގެ ގައިގައި މުގުރުން ތަޅައި ހަދާފައެވެ. 43 އަހަރުގެ ބަނާތު ފުލުހުންގެ ވޭނަށް އެރުވި އިރުވެސް އޭނާގެ ގައިން ލޭ އޮހެރެމުން ދިޔަކަމަށް އާއިލާގެ ބައެއް މީހުން ބުނެއެވެ.
ބަނާތަކީ ކުރިއަށް އޮތް އިންތިޚާބުގައި ކުރިމަތިލައިފައިވާ ކެންޑިޑޭޓެކެވެ. ފަލަސްތީނުގެ ފުލުހުންގެ އަނިޔާވެރި އަމަލުން އޭނާ މަރާލާފައިވާތީ ރާމަﷲގެ މަގުތަކުގައި މިއަދު މީޙުން ވަނީ މުޒާހަރާއަށް ނިކުމެފައެވެ.
ބަނާތަކީ އަރަބި ވެރިންގެ ޖަލުތަކުގައި އަނިޔާކޮށްގެން ކޮންމެ މަހަކު މަރުވާ އެތަކެއް މީހުންގެ ތެރޭން އެކަކެވެ. އަމިއްލަ ރައްޔިތުންގެ އިންސާނީ ހައްގަށް ފަރުވާލެއް ނުބަހައްޓާ މިސަރަހައްދުގައި ފުލުހުންގެ އަނިޔާވެރިކަމާއި ޖަލު ބަންދުގައި މީހުން މެރުމަކީ އާންމު ކަމެކެވެ. އަދި ވެރިންނަށް އުނދަގޫ ކުރާ މީހުންގެ ކިބައިން ސަލާމަތް ވުމަށް މިހާރު މިގައުމުތަކުގައި އޮންނަ އެންމެ ކުރުމަގަކީ، ޓެރަރިޒަމް ގެ ދައުވާކޮށް ދަންޖައްސާލުމެވެ.
