ޔޫއޭއީ އިން ޕާކިސްތާންގެ ޝީއީ މަޒުހަބުގެ މީހުން ޑިޕޯޓް ކުރަމުންދާ ކަމަށް ހިއުމަން ރައިޓްސް ވޮޗުން ތުހުމަތު ކުރެއެވެ. ޕާކިސްތާންގެ ދަ ނިއުސްއިން ބުނާ ގޮތުން 2015 އިން ފެށިގެން ޕާކިސްތާން މީހުން ބޭރު ގައުމުތަކުން ކޮންމެ ދުވަހަކުހެން އާދަވެގެން ޑިޕޯޓް ކުރަމުން ދެއެވެ.
ޕާކިސްތާން މީޑިއާއިން ވަނީ ޕާކިސްތާން މީހުންނަށް ބޭނުންވާ ކޮންސިއުލާ އެހީތެރިކަން އެމްބަސީތަކުން ނުދޭ މައްސަލަވެސް ސަމާލުކަމަށް ގެނަސްފައެވެ.
އެހެން ގައުމުތަކަށް ގަވާއިދާ ޚިލާފަށް ވަދެފައިވާ ޕާކިސްތާން މީހުން ކޮންމެ ދުވަހަކުހެން ޕާކިސްތާނަށް ބޭރު ކުރެވެމުންވެސް ދެއެވެ. މިކަމާ ގުޅިގެން ޖިއޯ ނިއުސްއިން ހޯދާފައިވާ މަޢްލޫމާތުން އެނގެނީ، 138 ގައުމަކުން 2015 އިން ފެށިގެން 618877 ޕާކިސްތާނު މީހުން ޑިޕޯޓް ކޮށްފައިވާ ކަމަށެވެ.
ހިއުމަން ރައިޓްސް ވޮޗްއިން ސިފަ ކުރިގޮތުގައި ޔޫއޭއީން ޕާކިސްތާން މީހުން ބޭރުކުރަނީ ނިޒާމުން ގެއްލުވާ ލުމުގެ ތެރޭންނެވެ.
ނިޒާމުން ގެއްލުވާލުން މާނަކޮށްފައި ވަނީ މީހާގެ އާއިލާއާއި ގާތް މީހުންނަށް އޭނާގެ ވާނުވާ ނޭގި އޭނާ ބަންދުގައި ބެއްޓުމަށެވެ. މިގޮތަށް މީހުން ބަންދުކޮށްފައި ޔޫއޭއީން އެމީހުން ޑީޕޯޓް ކޮށްލާކަމަށް ހިއުމަން ރައިޓްސް ވޮޗުން ބުނެފައި ވެއެވެ.
