ޗައިނާއިން މެލޭޝިއާގެ ވައިގެ ސަރަހައްދަށް މި ދިޔަ މަހު ވަދެފައި ވުމުން މެލޭޝިއާއިން އަވަސް ގޮތަކަށް ސަރަހައްދު ބެލެހެއްޓުމަށް މަތިންދާ ބޯޓް ގަތުމަށް ނިންމައިފިއެވެ. މެލޭޝިއާގެ ދިފާއީ ވުޒާރާއިން ބުނެފައިވާ ގޮތުގައި އެފަރާތުން ގަތުމަށް ވިސްނަމުން ދަނީ ލައިޓް ކޮމްބެޓް މަތިންދާބޯޓްތަކެކެވެ.
މެލޭޝިއާއިން މިހާރު ބޭނުން ކުރަނީ އިނގިރޭސި ހޯކް މަތިންދާ ބޯޓުގެ 18 އެއްޗަކާއި ތަމްރީނަށް ބޭނުން ކުރާ އެމްބީ 339 ސީއެމްގެ ހަތް ބޯޓަކާއި ލައިޓް ކޮމްބެޓް 208 ބޯޓެވެ.
މިވަގުތު ކުއްލިއަކަށް މެލޭޝިއާއިން ބޭނުން ވަނީ 18 ލައިޓް ކޮމްބެޓް މަތިންދާ ބޯޓް ގަންނާށެވެ. އަދި އަވަސް މުސްތަގްބަލެއްގައި މެލޭޝިއާގެ ޒަމާންވީ ބޯޓްތައް އައު ކުރަންވެސް ކުއާލަލަމްޕޯރ އިން ބޭނުން ވެއެވެ.
މެލޭޝިއާގެ ޑިފެންސް މިނިސްޓްރީން މިކަމަށް ހުޅުވާލާފައިވާ ޓެންޑަރގެ މުއްދަތު ހަމަވާނީ ސެޕްޓެމްބަރު 22 އަށެވެ.
މެލޭޝިއާއިން ވަނީ ބޭނުންވާ ވައްތަރުގެ ލައިޓް ކޮމްބެޓް ބޯޓްތައް އުފައްދާ ގައުމުތަކުން މަޢްލޫމާތުވެސް ހޯދާފައެވެ. އޭގެ ތެރޭގައި ދެކުނު ކޮރެއާއާއި އިންޑިއާއާއި ޕާކިސްތާން އަދި ޗައިނާ ހިމެނެއެވެ.
ޔޫރޭސިއަން ޓައިމްސްއިން ބުނާ ގޮތުގައި އިންޑިއާގެ ހިންދުސްތާން އެރޯނޯޓިކްސް ލިމިޓެޑްގެ ލައިޓް ކޮމްބެޓް އެއަރކްރާފްޓް ތޭޖާސް އަކީ މެލޭޝިއާއިން ބަލަމުންދާ ވައްތަރެކެވެ. އަދި މި ވައްތަރުގެ ބޯޓްތައް ޝޯޓްލިސްޓް ކޮސްފައިވާ ކަމަށްވެސް އެ ނޫހުން ބުންޏެވެ.
