ޓެރަރިޒަމަށް ފައިސާ ހޭދަ ކުރާ މީހުންނާ ދެކޮޅަށް ޕާކިސްތާނުން ހަރުދަނާ ފިޔަވަޅުތަކެއް އަޅަމުންދާ ކަމަށާއި އެހެން ނަމަވެސް އަދި އެއް ދާއިރާގައި ޕާކިސްތާނުން ކުރި ހޯދަން ޖެހޭ ކަމަށް އިންޓަރނޭޝަނަލް ފައިނޭންޝަލް އެކްޝަން ޓާސްކްފޯސް (އެފްއޭޓީއެފް) އިން ބުނެފިއެވެ.
ޖޫން 21ން 25އަށް ބާއްވާފައިވާ ބައްދަލުވުން ނިންމާލަމުން އެފްއޭޓީއެފް އިން ބުނެފައި ވަނީ އަދިވެސް ޕާކިސްތާން ހިމަނާފައި ވަނީ "އިތުރަށް ފާރަވެރި ވާން ޖެހޭ" ގިންތީގައެވެ.
"ޕާކިސްތާން ސަރުކާރުން ވަނީ ޓެރަރިޒަމަށް ފައިސާ ހޭދަކުރާ ފަރާތްތަކާ ދެކޮޅަށް ފިޔަވަޅު އެޅުމުގެ ނިޒާމު ހަރުދަނާ ކޮށް ކުރިއެރުންތަކެއް ހޯދާފައެވެ. 2018ގެ ޖޫން މަހު ޕާކިސްތާން ސަރުކާރުން އަމަލުކުރުމަށް ކަނޑައެޅި 27 ކަންކަމުގެ ތެރޭން 26 ކަމެއް ޕާކިސްތާން ސަރުކާރުން ވަނީ ފުރިހަމަ ކޮށްފައެވެ." އެފްއޭޓީއެފްގެ ރައީސް ޑރ. މާރކަސް ޕްލެޔަރ ވިދާޅުވިއެވެ.
ޑރ ޕްލެޔަރ ވިދާޅުވިގޮތުގައި ޕާކިސްތާނުން ދެން އަމަލުކޮށް ފިޔަވަޅު އަޅަން ޖެހޭ އެންމެ މުހިންމު ކަމަކީ އދން ޓެރަރިސްޓުން ކަމަށް ކަނޑައަޅާފައިވާ ޓެރަރިސްޓް ޖަމާއަތްތަކުގެ އިސްވެރިންގެ މައްސަލަތައް ތަހުގީގުކޮށް ޝަރީއަތްކުރުމުގެ ކަންކަން ކުރިއަށް ގެންދިއުމެވެ.
