އިޓަލީވިލާތުން ޗައިނާއާއެކު ގާތް ގުޅުމެއް ބޭއްވުމަށްފަހު ސަރުކާރު ބަދަލުވުމާއެކު އިޓަލީން ވަނީ ސިޔާސަތު ބަދަލުކޮށްފައެވެ. އިޓަލީގެ އައު ސަރުކާރުން ބުނެފައި ވަނީ އިޓަލީން ބޭނުން ވަނީ ބައިނަލްއަގްވާމީ ފެންވަރުގައި ގައުމުތަކާއެކު ގުޅުންތައް ބާއްވާށެވެ. އަދި އިޓަލީއަކީ ޒަމާނުއްސުރެން ޔޫރަޕްގެ ގައުމުތަކާ އެއްގޮތް ސިޔާސަތެއް ގެންގުޅޭ ގައުމެއް ކަމަށާއި އިޓަލީއަކަށް އެޓްލާންޓިކް އިއްތިހާދުގެ ގުޅުމަކުން ވަކި ވެގެން ނުދެވޭނެ ކަމަށެވެ.
2019ން ފެށިގެން އިޓަލީއަކީ ޗައިނާގެ ގާތް ބައިވެރިއެކެވެ. ރޯމަށް ޒިޔާރަތް ކުރާ ޗައިނާ ފަތުރުވެރިންނަށް އެހީތެރިވެދީ އެމީޙުންގެ ސަލާމަތީ ކަންކަން ބެލެހެއްޓުމަށް ޗައިނާ ސިފައިންވެސް ބައިތިއްބައިފައި ވިއެވެ.
ޗައިނާއާއި އިޓަލީން ގާތް ވުމުގެ ސަބަބުން އިޓަލީގެ އުފެއްދުންތައް ބާޒާރަށް ނެރެ ދިނުމަށް ޗައިނާއިން އެހީތެރިވެ ދިނެވެ. ނަމަވެސް އިޓަލީގެ ސިޔާސަތަށް އެމެރިކާއާއި ޔޫރަޕުން ފާޑު ކިޔަމުން ދިޔައެވެ.
ޗައިނާއިން ހޮންގކޮންގއާއި ޝިންޖިއާންއާ ގެންގުޅޭ ސިސާތާ ބެހޭ ގޮތުން އިޓަލީ ޕާލަމެންޓްގައި މިހާރު ބަހުސް ކުރެވެއެވެ. މެއި މަހު ބާއްވާފައިވާ ބަހުސެއްގައި އިޓަލީ ޕާލަމެންޓް މެމްބަރުން ވަނީ ޗައިނާއިން ޝިންޖިއާންގައި ހިންގާ ލާއިންސާނީ އަމަލުތައް ކުށްވެރިކޮށްފައެވެ. އޭގެ ކުރިން ފާސްކޮށްފައި ވަނީ ޔޫރަޕްގެ ގައުމުތަކާ ގުޅިގެން ހޮންގކޮންގއާ ބެހޭ ގޮތުން އެއްގޮތް ސިޔާސަތެއް އިޓަލީގައި ގެންގުޅުމަށް ބާރުއަޅައި ގަރާރެއް ފާސްކޮށްފައެވެ.
ޔޫރަޕްގެ މަސްއޫލުވެރިންނާ ދެކޮޅަށް ޗައިނާއިން އެޅި ފިޔަވަޅުގެ ރައްދުގައި ޔޫރަޕްގެ ޕާލަމެންޓުން، ޗައިނާއާއެކު ވިޔަފާރި ނުކުރުމަށް ގޮވާލި ގަރާރަށް އިޓަލީ ޕާލަމެންޓުން ވަނީ ތާއީދުކޮށްފައެވެ.
ބެލެވޭ ގޮތުގައި އިޓަލީގެ އައު ސަރުކާރުން ބޭނުން ވަނީ ބައިނަލްއަގްވާމީ މަސްރަހުގައި އިޓަލީގެ ދައުރު ވަރުގަދަކުރުމަށް މަސައްކަތް ކުރާށެވެ.
