ޕާކިސްތާނަށް ކޮވިޑް19ގެ ހަތަރު ވަނަ ރާޅެއް ލައިގަންނާނެ ކަމަށް ސަރުކާރުން އިންޒާރު ދީފިއެވެ. ޕާކިސްތާންގެ ޕްލޭނިންގ މިނިސްޓަރ އަސަދު އުމަރު ޓުއިޓާގައި ވިދާޅުވީ، ޕާކިސްތާންގައި ކޮވިޑާ ކުރިމަތިލުމަށް ހަދާފައިވާ އެސްއޯޕީއަށް ރައްޔިތުން ތަބާ ނުވަނީ ނަމަ، ޖުލައި މަހު ހަތަރު ވަނަ ރާޅަކާ ކުރިމަތިލާން ޖެހިދާނެ ކަމަށެވެ. އުމަރު ވިދާޅުވިގޮތުގައި ޕާކިސްތާނުން މިގޮތަށް ލަފާ ކޮށްފައި ވަނީ ކޮވިޑް19ގެ ބައްޔާ ބެހޭ ގޮތުން މަސްނޫއީ ސިކުނޑި ބޭނުންކޮށްގެން ހަދާފައިވާ މޮޑެލްތަކަށް ބަލާފައެވެ.
ޕާކިސްތާނަށް ކޮވިޑް19ގެ ތިންވަނަ ރާޅު ކުރިމަތިވީ، މާޗް މަހުގައެވެ. އަދި ކޭސްތައް އެންމެ ގިނައިން ފެނިގެން ދިޔައީ، އެޕްރީލް މަސް ތެރޭގައެވެ. މެއި މަހު ވަނީ ޕޮޒިޓިވް ކޭސްތައް މަދުވާން ފަށާފައެވެ.
ޕާކިސްތާނުން މިހާރު ވަނީ ބޭރަށް ވަޒީފާއަށް ދާން ބޭނުންވާ މީހުންނަށް ފައިޒަރ ވެކްސިން ދޭން ނިންމާފައެވެ. ޕާކިސްތާނަކީ، ދެކުނު އޭޝިއާގައި އެންމެ ގިނައިން މީހުން ބޭރަށް ވަޒީފާއަށް ފޮނުވާ ގައުމެވެ. ނަމަވެސް ސަރުކާރުން ޝަރުތުކޮށްފައި ވާގޮތުން، ފައިޒަރ ވެކްސިން ޖަހައި ދޭނީ، ސައޫދީ އަރަބިއްޔާފަދަ، ޗައިނާ ވެކްސިން ބަލައި ނުގަންނަ ގައުމުތަކަށް ދާ މީހުންނަށެވެ.
ޕާކިސްތާންގެ ވެކްސިން ދިނުމުގެ ޕްރޮގްރާމް ދަނީ ކުރިއަށެވެ. ހުކުރު ދުވަހުވެސް ތިން ލައްކަ ތިރީހާހަށް ވުރެން ގިނަ މީހުންނަށް ވެކްސިން ދީފައި ވެއެވެ. މުޅީ ވެކްސިން ދިފައިވާ މީހުންގެ ޖުމުލަ ސާދަ މިލިއަނަށް އަރައެވެ.
