ތާލިބާން ބާރުގަދަ ވެގެން އުޅެނީ ޕާކިސްތާނުން ތާލިބާނަށް މިދިޔަ ވިހި އަހަރުގެ ތެރޭގައި ވާގިވެރިވެފައި ވުމުން ކަމަށް އެމެރިކާގެ ގައުމީ ސަލާމަތާ ބެހޭ ކުރީގެ މުސްތަޝާރު ޖޯން ބޯލްޓަން ވިދާޅުވެއެވެ. ވޮއިސް އޮފް އެމެރިކާ ގައި ވާހަކަ ދައްކަވަމުން އޭނާ ވިދާޅުވީ، ޕާކިސްތާން ސަރުކާރުން ވަނީ ތާލިބާންއަށް ޕާކިސްތާން ގައި ހަރަކާތްތެރި ވެވޭ ގޮތަށް ކަން ކަން ފަހިކޮށްދީފައި ކަމަށެވެ.
އަފްޣާން ނޫސް އެޖެންސީ ކީމާއިން ބޯލްޓަންއާ ޙަވާލާ ދީ ބުނެފައި ވަނީ ތާލިބާނުން އަފްޣާނިސްތާންގައި ވެރިކަމަށް އައިސްފިނަމަ އެކަމުގެ ނުރައްކާ ޕާކިސްތާނަށްވެސް ކުރާނެ ކަމަށެވެ. އަދި ޕާކިސްތާންގެ ޓެރަރިސްޓް ޖަމާއަތްތަކަށް ހިތްވަރު ލިބި ޕާކިސްތާނާ ދެކޮޅަށް ދޭ ހަމަލާތައް އިތުރު ވެގެންދާނެ ކަމަށެވެ.
އަފަޣާނިސްތާންގެ މަސްރަހު ކުރިއަށް އޮތް ދުވަސްތަކުގައި ނާޒުކު ވާނެ ކަމަށް ބެލެވޭތީ، އަފްޣާނިސްތާންގެ ރައީސް އަޝްރަފް އަބްދުލްޣަނީ ވަނީ މަތީފެންވަރުގެ ވަފްދަކާއެކު ބުދަ ދުވަހު އެމެރިކާއަށް ވަޑައިގެންފައެވެ. މި ވަފްދުގައި އަފްޣާނިސްތާންގެ ގައުމީ ސުލްހައަށް މަސައްކަތް ކުރައްވާ އިދާރާގެ ވެރިޔާ އަބްދުﷲ އަބްދުﷲއާއި ނާއިބް ރައީސާއި، ޚާރިޖީ ވަޒީރާއި ހިއުމަން ރައިޓްސް ކޮމިޝަންގެ ބޭފުޅުންނާއި އަފްޣާނިސްތާންގެ ސުލްޙައިގެ ވާހަކަތަކުގައި އުޅުއްވާ ޓީމްގެ އަންހެން މެންބަރުންވެސް ޣަނީ އަހިރު ވޮޝިންޓަނަށް ވަޑައިގަތެވެ.
އެމެރިކާގެ ރައީސް ޖޯ ބައިޑެން ވަނީ އެމެރިކާ ސިފައިން ފޭބި ނަމަވެސް ވަރަށް ގާތުން އެމެރިކާއިން އަފްޣާނިސްތާން ސަރުކާރާއެކު މަސައްކަތް ކުރާނެ ކަމަށް ވިދާޅުވެފައެވެ.
ބޯލްޓަން ވިދާޅުވިގޮތުގައި އެމެރިކާ ކޮންގްރެސްގައި މަޝްވަރާ ކުރެވޭ ފަދައިން މި ވަގުތު އަފްޣާނިސްތާނަށް އެންމެ ރަނގަޅު ވާނީ، ހުރިހައި ސިފައިން ނުބާލައި އަފްޣާނިސްތާން ސަރުކާރަށް ހިތްވަރު ލިބޭ ގޮތަށް މަދު އަދަދެއްގެ ސިފައިން އަފްޣާނިސްތާންގައި ބައިތިއްބާށެވެ.
