ދައުލަތުން ހުއްދަ ދީފައިނުވާ ފަރާތްތަކުން ދީނީ ކަންކަމުގައި ބަސްބުނެ ފަތުވާދީ ހެދުމާ ދެކޮޅަށް މިސްރުގެ މަތީ ކޯޓަކުން ޙުކުމް ކޮށްފިއެވެ. މިސްރުގެ ސުޕްރީމް ކޯޓުން ސަރުކާރަށް ގޮވާލާފައި ވަނީ ކޮންމެ ކޮންމެ މީހަކު ފަތުވާދީ، ދީނުގެ ޙުކުމްތައް ބުނުމާ ބެހޭ ކަންކަން ގާނޫނަކުން މަނާ ކޮށްދިނުމަށެވެ. އަދި ދައުލަތުގެ އިދާރާތަކުން ހުއްދަ ދީފައި ނުވާ ފަރާތްތަކުން މީސްމީޑިއާގައި ފަތުވާ ދިނުމަކީ މަނާކަމެއް ކަމަށްވެސް ކޯޓުން ވަނީ ނިންމާފައެވެ.
މިސްރުގެ ސުޕްރީމް ކޯޓުން މި ޙުކުމް ކޮށްފައި ވަނީ ހަރުކަށި ފިކުރު ފެތުރުމަށް ބައެއް ފަރާތްތަކުން ފަތުވާތައް ދީ، ދީނުގެ މެދުމިނުގެ ފިކުރާ ޚިލާފްވާ ގޮތަށް މީހުންގެ މެދުގައި ދީނީ ޚިޔާލުތައް ފަތުރަމުން ދިއުމާ ގުޅިގެންނެވެ.
އެގޮތުން އަންހެން ކުދިން ޚިތާނު ކުރުމަކީ މިސްރުގައި މަނާކަމެއް ކަމުގައި ސަރުކާރާއި ދީނީ މުއައްސަސާތަކުން ކަނޑައަޅައިފައިވާއިރު މީސްމީޑިއާގައި އެކަން ހުއްދަކޮށް، ހިތްވަރު ލިބޭ ގޮތަށް ބައެއް ފަރާތްތަކުން ވާހަކަ ދެއްކުން ވަނީ އާންމު ކަމަކަށް ވެފައެވެ.
މިސްރުގައި ސަލަފީ ޚިޔާލުގެ މީހުން ހަރުކަށި ފިކުރު ފަތުރަމުންދާތީ އެކަން ބޮޑު ވެގެން މިސްރުގެ މުފްތީ ޝައުޤީ ޢައްލާމްވެސް ވަނީ މިކަންކަމާ މެދު ހަރުކަށި ފިޔަވަޅު އެޅުމަށް ގޮވައިލައްވާފައެވެ.
ޝައުޤީ ޢައްލާމްގެ ގޮވައިލެއްވުމަށް އިސްލާމީ ދުނިޔޭގެ ދަންނަބޭކަލުންގެ ކޮންފަރެންސަކަށްވެސް މިސްރުން ދަނީ ތައްޔާރު ވަމުންނެވެ. ރާއްޖޭން އަލްއުސްތާޛް މައުމޫނަށް ވަނީ މި ކޮންފަރެންސްގައި ބައިވެރިވެ ވަޑައިގަތުމަށް ދައުވަތު ފޮނުވާފައެވެ.
މިސްރުގެ ޕާލަމެންޓު މެމްބަރަކު ބުނިގޮތުގައި އޭނާ ވަނީ ހަރުކަށި ދީނީ ފިކުރު ފެތުރުމާއި ހުއްދަ ނެތި ދަންނަކަން ބުނުމާއި ފަތުވާ ދިނުމާ ދެކޮޅަށް ގާނޫނެއް ހެދުމަށް މަސައްކަތް ފަށާފައެވެ.
