އިނގިރޭސިވިލާތުގައި ދުނިޔޭގެ ބޮޑެތި ޑިމޮކްރެސީތަކުން ބައްދަލުވުން ނިންމާލާފައި ވަނީ "މިހާރަށް ވުރެން ރަނގަޅު ދުނިޔެއެއް ބިނާ ކުރުމަށް" ދައުވަތު ދެމުންނެވެ. އެ ގައުމުތަކުން ހުށަހެޅި މި ހުށަހެޅުމަކީ B3W ނުވަތަ ބިލްޑް ބެކް ބެޓަރ ވަރލްޑް ގެ ހުށަހެޅުމެވެ.
ދުނިޔޭގެ މިދިޔަ ދެ އަހަރުގެ ހާލަތަށް ބަލާއިރު، މުޅި ދުނިޔެ މިވަނީ މަރާމާތަކަށް ބޭނުންވެފައެވެ. ގްލޯބަލައިޒޭޝަންގެ އޮއިވަރާއެކު ބަވަނަ ވެގެން ދިޔަ ދުނިޔޭގައި، އިގްތިސާދީ އިޖުތިމާއީ ބޮޑެތި ބަދަލުތަކެއް ގައުމުތަކަށް އައިސްފިއެވެ. ޑިމޮކްރެސީއާއި މިނިވަންކަން ބޭނުންވާ ކަމަށާއި އަމިއްލަ ޚިޔާލު ފާޅުކުރަން ޖެހިލުން ނުވާކަން ރައްޔިތުން ވަނީ ސާބިތުކޮށްދީފައެވެ. އިގްތިސާދީ ފުދުންތެރިކަމާއި ޒާތީ މިނިވަންކަން ބޭނުންވާ ކަންވެސް ސާބިތުކޮށެދިނެވެ.
ގައުމުތަކުން އިގްތިސާދީ ތަރައްގީއަށް ބޭނުންވި ފައިސާ ނިކަން ދީލަތިކަމާއެކު ލިބިގެން ދިޔައީ، ދުނިޔޭގެ ހުރިހައި ހިސާބެއްގައި މަޝްރޫއުތައް ހިންގަން ފެންބޮވައިގެންފައި ހުރި ބާރަކުންނެވެ. ޗައިނާ ބޭނުންވީ ދުނިޔޭގެ ހުރިހައި ބިތެއް ބެއިޖިންގއާ ގުޅުވާލާށެވެ. މިކަމަށްޓަކައި ޗައިނާ ފެށި ސިލްކް ރޯޑާއި ބެލްޓް އެންޑް ރޯޑްގެ ޕްރޮޖެކްޓްތަކަށް ފަހިކޮށްދިން ކޮންމެ ގައުމަކަށްވެސް ބޮޑު އަގުތަކުގައި ޗައިނާއިން އިންވެސްޓްކޮށް ދިނެވެ. މި އިންވެސްޓްމެންޓްތައް ދިޔައީ ދެފަރާތް ދެމެދު ސޮއިކުރެވޭ ސިއްރު އެއްބަސްވުމެއްގެ ތެރެއިން ދުނިޔޭގެ މާލީ ނިޒާމުގެ ހިސާބުކިތާބު ބެލުމުގެ ބޭރުންނެވެ.
ދުނިޔޭގެ މާލީ ނިޒާމުގެ ހިސާބުކިތާބު ބެލުމުގެ ބޭރުން ދިއުމުގެ މާނައަކީ، ގައުމުތަކަށް ދަރަންޏަށް ފައިސާ ނެގޭނެތޯ ނުވަތަ އެ ދަރަނި ދެއްކޭނޭތޯ ބެލުމަކާ ނުލައި ދަރަނި ދެމުން ދިޔަ ވާހަކައެވެ. މިކަން ބަލާފައި ނުވާ ސަބަބަކީ، ފައިސާ ނުދެއްކިއްޖެ ނަމަ، މުގާބިލުގައި ހަރުމުދާ ގަނޑެއް ވަދީޢާއެއްގެ ގޮތުގައި ބާއްވަން ޖެހި އެއިން ދިގު މުއްދަތަކަށް މަންފާ ނެގުމަށްޓަކައެވެ. ސްރީލަންކާގެ ހަމްބަންޓޯޓާ ބަނދަރަކީ މީގެ އެއް މިސާލެކެވެ.
"މިހާރަށް ވުރެން ރަނގަޅު ދުނިޔެއެއް ބިނާ ކުރުމަށް" ދައުވަތު ދޭން ޖެހޭ ސަބަބުތަކެއްވެސް ވެއެވެ. މިއަދުގެ ދުނިޔެއަކީ، ހިއުމަން ޓްރެފިކިންއާއި، ގަދަކަމުން މީހުން ލައްވައި މަސައްކަތް ކުރުވުމާއި ނާޖާއިޒު ފައިދާ ނެގުމާ ދެކޮޅަށް އެންމެންވެސް މަސައްކަތް ކުރަން ބޭނުންވާ އެއްގައުމުން އަނެއް ގައުމުގެ ޙާލަތަށް ބައިނަލްއަގްވާމީ ފޯރަމްތަކުގައި ފާޑުކިޔުމަށް ހުޅުވާލާފައިވާ ނިޒާމެއް ކަމުން މީހުންގެ ހައްގުތައް ރައްކާތެރި ކުރެވެން ޖެހެއެވެ.
ޗައިނާގެ ބެލްޓް އެންޑް ރޯޑް ޕްރޮޖެކްޓްތަކުގައި މަސައްކަތް ކުރި ހުރިހައި ހިސާބެއްގައިވެސް މަސައްކަތް ކޮށްފައި ވަނީ ޗައިނާގެ އަމިއްލަ ރައްޔިތުން ލައްވައެވެ. އެ މަސައްކަތް ތެރިން ހޯދާފައިވާ ގޮތް ސާފެއް ނޫނެވެ. އިޢްލާނެއް ކޮށްގެން ކަމެއް ނުވަތަ އެޖެންސީއެއް މެދުވެރިކޮށްގެން ކަމެއް ސާފެއް ނޫނެވެ.
ޗައިނާގެ ލޭބަރ ވޮޗްއިން ޝާއިއުކޮށްފައިވާ ރިޕޯޓެއް މިހާރު ސަމާލުކަމަށް އައިސްގެން ގިނަ ބަޔަކު ސުއާލު ކުރަމުން ދެއެވެ. ލެބަރ ވޮޗްގެ ރިޕޯޓްގެ ނަމަކީ، "ސައިލެންޓް ވިކްސްޓިމްސް އޮފް ލޭބަރ ޓްރެފިކިންގ: ޗައިނާޒް ބެލްޓް އެންޑް ރޯޑް ވަރކަރޒް ސްޓްރޭންޑެޑް އޯވަރސީޒް އެމިޑް ކޮވިޑް ޕެންޑެމިކް19" މިއެވެ. މި ރިޕޯޓްގައި ބަލާފައި ވަނީ، އިންޑޮނޭޝިއާއާއި އަލްޖީރިއާއާއި ސިންގަޕޯރއާއި ޖޯރޑެންއާއި ޕާކިސްތާނާއި ސަރބިއާގައި މަސައްކަތް ކުރުމަށް ގެންގޮސްފައިވާ މީހުންނާ ބެހޭ ގޮތުންނެވެ.
ޗައިނާގެ ރައީސް ޝީ، މީގެ ނުވަ އަހަރު ކުރިން ވެރިކަމަށް ވަޑައިގެން ހިންގަވަން ފެއްޓެވި ސިޔާސަތަކީ، ޗައިނާގެ ކުރީގެ ލީޑަރު ޑެންގ ޝިއާއޮ ޕިންގ، ވިދާޅުވި މޮޅު ލިބޭ އިރު ހިތްތިރިވާން ޖެހޭ ސިޔާސަތާ މުޅިންވެސް ޚިލާފު ސިޔާސަތެކެވެ.
"މިހާރަށް ވުރެން ރަނގަޅު ދުނިޔެއެއް ބިނާ ކުރުމަށް" ދައުވަތު ދޭން ޖެހޭ އަނެއް ސަބަބަކީ، ދުނިޔޭގައި ކަނާތުފިޔައިގެ ބައެއް ސިޔާސީ ލީޑަރުން ވަނީ ގައުމުތަކުގެ އެތެރޭގައި ބައިބައި ވުން އުފައްދައި ބައިގިނަ މީހުންގެ ބާރުގައި ބައިމަދު މީހުންގެ އަޑު ކަނޑުވައިލާން ފަށާފައެވެ. މި ކަންކަން އަވަށްޓެރި އިންޑިއާއާއި ސްރީލަންކާއިން ފެންނާން އެބަހުއްޓެވެ.
ހުޅަނގުގެ ޑިމޮކްރެސީތަކުން ގޮވައިލި، ރަނގަޅު ދުނިޔެއެއް ބިނާ ކުރުމުގެ މަސައްކަތަކަށް އަވަސް ގޮތަކަށް އަމަލީ ސިފައެއް ޖެހިގެނެއް ނުދާނެއެވެ. ނަމަވެސް ދުނިޔޭގެ ރޯ މާއްދާތަކުގެ ކޮންޓްރޯލް ނެގުމުގެ މައްސަލައާއި ގައުމުތަކުގެ ބިމުގެ ސިޔާދަތު ގެއްލުމުގެ މައްސަލަތަކަކީ، މިހާރަށް ވުރެން ރަނގަޅު ދުނިޔެއެއް ބިނާ ކުރުމަށް ކުރާ ބަހުސްގައި ބަލާލެވޭނެ ބޮޑު މަންޒަރެވެ.
ކޮވިޑް19އާ ގުޅިގެން މުޅި ދުނިޔޭގެ ވާސާގެ ނާޒުކުކަމާއި ގައުމުތަކުގެ ހާލަތު ވަނީ ސިއްރެއް ނެތް މިންވަރަށް އެންމެނަށް ފާޅު ވެގެން ގޮސްފައެވެ.
މިހާރަށް ވުރެން ރަނގަޅު ދުނިޔެއެއް ބިނާ ކުރުމަށްޓަކައި ގައުމުތަކުގެ ބިއްދޮއް ފަރާތުގައި ހިނގާ ކަންކަންވެސް ބަލާނެ ކަން ޔަގީނެވެ. ދުނިޔެއަށް ބަދަލުތަކެއް އައިނަމަވެސް ޚާރިޖީ ސިޔާސަތުގައި ގެންގުޅޭ ޖޭމްސް މޮންރޯގެ ނަޒަރިއްޔާތު ކަމަށްވާ ދުރުތިބީން އައިސް އެހެން ގައުމުތަކުގެ ބިއްދޮއްފަރާތަށް ނުފޫޒު ފޯރުވުމަކީ އަދިވެސް ބަލައިގަންނަ ކަންތައްތަކެއް ނޫނެވެ.
ޗައިނާއިން ވަނީ ބެލްޓް އެންޑް ރޯޑް ޕްރޮޖެކްޓްތަކުގެ ތެރޭން ލައިގެން ދުނިޔޭގެ އެތައް ގައުމެއްގައި ތިން ހާސް އެތައް ޕްރޮޖެކްޓެއް ފަށާފައެވެ. ޔަގީނުންވެސް ޖީ7ގެ ގައުމުތަކުން ގޮވައިލި، މިހާރަށް ވުރެން ރަނގަޅު ދުނިޔެއެއް ބިނާ ކުރުމުގެ ވާހަކައަކީ، ދަރަނި ދެއްކުން ދަތިވާ ކޮންމެ ގައުމަކަށްވެސް ރީތި ރާގަކަށް ވާނެ ލަވައެކެވެ.
