އިންސާނީ ހައްގުތަކާ ބެހޭ އދގެ ކައުންސިލްގެ 47 ވަނަ ޖަލްސާގައި، އިންޑިއާއާއި ޕާކިސްތާނުން ބަހުގެ ހަމަލާތައް ބަދަލުކޮށްފިއެވެ. ޕާކިސްތާނުން ވަނީ އިންޑިއާއިން ކަޝްމީރުގައި ހިންގާ އަމަލުތަކާ ބެހޭ ގޮތުން ކައުންސިލްގެ ސަމާލުކަމަށް ގެނައުމަށް ވާހަކަ ދައްކާފައެވެ.
ޕާކިސްތާންގެ ވާހަކައަށް ރައްދު ދެމުން އިންޑިއާއިން ބުނެފައި ވަނީ ޕާކިސްތާނުން ވާހަކަ ދައްކަނީ އެގައުމުގެ އިންސާނީ ހައްގުތަކުން ސަމާލުކަން އަނބުރާލަން ކަމަށެވެ.
އިންޑިއާއިން ބުނެފައި ވަނީ ޕާކިސްތާނަކީ، ނިޒާމުގެ ތެރޭން މީހުން ގެއްލުވާލާ ގައުމެއް ކަމަށާއި، ޕާކިސްތާނަކީ ނޫސްވެރިކަން ކުރުމަށް ނުރައްކާ މާހައުލެއް އޮންނަ ގައުމެއް ކަމަށެވެ. އަދި ޕާކިސްތާންގައި ބައިމަދު ދަރިކޮޅުގެ މީހުންގެ އަދަދު އަހަރަކުން އަހަރަށް ދަށްވަމުންދާ ކަމަށާއި، ބައިމަދު ދީންތަކުގެ އަންހެން ކުދިން ވަގަށް ނަގައިގެން ގަދަކަމުން ދީން ބަދަލު ކުރުވައި މީހުންނާ ކައިވެނި ކުރުވާ ކަމަށެވެ.
މީގެ އިތުރުން ޕާކިސްތާނުން ޓެރަރިސްޓުންގެ ލިސްޓުގައި ހިމެނިފައިވާ ބޮޑެތި ކުށްވެރިންނަށް ދައުލަތުން ޕެންޝަން ދެމުންދާ ކަމަށްވެސް ތުހުމަތު ކޮށްފައި ވެއެވެ.
ޕާކިސްތާންގެ އިންސާނީ ހައްގުތަކުގެ މައްސަލާގައި ޕާކިސްތާން ޖަވާބުދާރީ ކުރުވެން ޖެހޭކަމަށްވެސް އިންޑިއާއިން ބުންޏެވެ.
