ހޮންގކޮންގގައި އެޕަލް ޑެއިލީ ނޫހުގެ ނޫސްވެރިން ހައްޔަރުކުރުމަށްފަހު، ނެކްސްޓް ޑިޖިޓަލްގެ ނޫސްވެރިއަކުވެސް ހައްޔަރުކޮށްފިއެވެ. މި ނޫސްވެރިން ހައްޔަރުކޮށްފައި ވަނީ ޗައިނާގެ ގައުމީ ސަލާމަތާ ބެހޭ ގާނޫނުގެ ދަށުންނެވެ. ރިޕޯޓަރޒް ވިތުއައުޓް ބޯރޑާޒް އިން ވަނީ އެޕަލް ޑެއިލީގެ ފައިސާތައް ހިފަހައްޓައި، އެނޫސް ބަންދުކުރުމަށް ޗައިނާއިން މަޖުބޫރު ކުރުވި މައްސަލަ ކުށްވެރިކޮށްފައެވެ.
އެޕަލް ޑެއިލީއަކީ ބެއިޖިންގއަށް ފާޑުކިޔާ ޑިމޮކްރެސިއަށް ވާހަކަ ދެއްކި ނޫހެކެވެ.
ރިޕޯޓާސް ވިތުއައުޓް ބޯރޑާޒްއިން ބުނެފައި ވަނީ ބައިނަލްއަގްވާމީ މުޖުތަމައިން ރައީސް ޝީއާ ދެކޮޅަށް ފިޔަވަޅު ނައަޅައިފިނަމަ، ޗައިނާގައި ނޫސްވެރިކަން ހިނދައިލެވުނު ގޮތަށް ހޮންގ ކޮންގ އިންވެސް ނޫސްވެރިކަން ނެތިގެން ހިނގައިދާނެ ކަމަށެވެ. އަދި އެ ޖަމާއަތުން ވަނީ އދންވެސް ހޮންގ ކޮންގގެ މިނިވަން ނޫސްވެރިކަން ދެމެހެއްޓުމަށް މަސައްކަތްތައް ކޮށްދިނުމަށް އެދިފައެވެ.
ޗައިނާއިން އެޕަލް ޑެއިލީއާއި ނެކްސްޓް ޑިޖިޓަލްއާ ދެކޮޅަށް ފިޔަވަޅުއަޅަން ފެށީ މިދިޔަ ޑިސެމްބަރު މަހު ހޮންގ ކޮންގގެ ސާދާގަރު ޖިމީ ލާއި ހައްޔަރު ކުރި ފަހުންނެވެ. އޭނާއަކީ މި ދެ ނޫހަށްވެސް ފަންޑް ކުރާ ފަރާތެކެވެ.
އެޕަލް ޑެއިލީގެ ފަސް އިސްވެރިއަކުވެސް މިދިޔަ ހަފްތާގައި ވަނީ ހައްޔަރުކޮށްފައެވެ.
ޔޫރަޕްގެ ޖަމާއަތުން ބުނެފައި ވަނީ ގައުމީ ސަލަމަތާ ބެހޭ ގާނޫނުގެ ބޭނުން ހިފައިގެން މީހުންގެ މިނިވަންކަން ހަނިކުރަމުންދާ ތަން ފެންނަ ކަމަށެވެ. މިކަމުގެ ސަބަބުން ހޮންގކޮންގއަކީ މިނިވަން ވިޔަފާރީގެ މަރުކަޒަކަށް ވުމަށްވެސް ހިޔަނި އެޅޭކަމަށް އެޖަމާއަތުން ބުންޏެވެ.
