އިންޑިއާގެ ލަދާކް ސަރަހައްދަށް ޗައިނާއިން ވަންތާ އަހަރެއް ވެގެންދާއިރުވެސް ޗައިނާއާއެކު މަޝްވަރާ ކޮށްގެންވެސް މި މައްސަލަ ހައްލު ކުރުމަށް ނިއުދިއްލީން ދަނީ މަސައްކަތް ކުރަމުންނެވެ. މިހަފްތާގައި އެންމެ ފަހުން ބާއްވާފައިވާ މަޝްވަރާގައި ޗައިނާއިން އެއްބަސްވެފައި ވަނީ އަސްކަރީ މަޝްވަރާތައް އަދިވެސް ކުރިއަށް ގެންދިއުމަށެވެ.
ލަދާކް ސަރަހައްދާ ގުޅިގެން އިންޑިއާއާއި ޗައިނާއާ ދެމެދު 22 ބައްދަލުވުން ބާއްވާފައި ވެއެވެ. ދެފަރާތުގެ އެންމެ ފަހުގެ މަޝްވަރާތަކުގައި އެއްބަސްވެފައި ވަނީ އިސް ކޮމާންޑަރުންގެ 12 ވަނަ ބައްދަލުވުމެއް ބޭއްވުމަށެވެ. ކޮމާންޑަރުންގެ ބައްދަލުވުން އެންމެ ފަހުން ބާއްވާފައި ވަނީ 12 މާޗްގައެވެ.
އިނޑިއާގެ އެކްސްޓާނަލް އެފެއާޒް މިނިސްޓްރީން ބުނެފައި ވަނީ ދެ ފަރާތުގެ މަޝްވަރާތަކުގައި ހުޅަނގު ސަރަހައްދު އަމާން ކޮށް ބޭއްވުމަށްޓަކައި ވަރަށް ހުޅުވާލައިގެން މައްސަލަތަކާ މެދު މަޝްވަރާތައް ބާއްވާފައިވާ ކަމަށެވެ.
މިހާރު ބާއްވަމުން ގެންދާ މަޝްވަރާތައް ބާއްވަމުން މިގެންދަނީ، 2020ގެ ސެޕްޓެމްބަރުގައި ދެ ގައުމުގެ ޚާރިޖީ ވަޒީރުން އެއްބަސްވެފައިވާ އޮނިގަނޑުގެ ތެރޭގައެވެ.
އިންޑިއާއިން ވަނީ ލަދާކް ސަރަހައްދަށް ސިފައިން އެއްކޮށް ސަރަހައްދު ނުތަވަސް ކުރުމުގެ ޒިންމާ ޗައިނާއަށް ރައްދުކޮށްފައެވެ. މިއީ ފަންސާސް އަހަރުގެ ތެރޭގައި ފުރަތަމަ ފަހަރަށް ދެ ގައުމުގެ ސިފައިންގެ ދެމެދު މައްސަލަ ހޫނުވި ފުރަތަމަ ފަހަރެވެ.
