ޕޮލެންޑްގައި ނާޒީން ފޭރިގަތް ޔަހޫދީންގެ މިލްކިއްޔާތަށް ބަދަލު ދިނުމަށް 30 އަހަރު ދުވަހުގެ މުއްދަތެއް ކަނޑައަޅައި ބުރާސްފަތި ދުވަހު ވާރްސޯގައި ގާނޫނެއް ފާސްކުރުމުން އިޒްރޭލުން ޕޮލެންޑަށް ބަހުގެ ހަމަލަތައް ދޭން ފަށައިފިއެވެ. އިޒްރޭލުން ވަނީ ޕޮލެންޑްގެ އެމްބެސެޑަރު ފޮރިން މިނިސްޓްރީއަށް ހާޒިރުކޮށް، މި ގާނޫނު ތަސްދީގު ނުކުރުމަށް އަންގާފައެވެ. އަދި ޕޮލެންޑުން ވަނީ އިޒްރޭލް އެމްބެސެޑަރު ހާޒިރުކޮށް ޕޮލެންޑްގެ ގާނޫނާ ބެހޭ މާއްލޫމާތު ދީ، ހޭލުންތެރި ކުރުވުމަށް މަސައްކަތް ކޮށްފައެވެ.
ޕޮލެންޑުން ބުނަނީ އެގައުމުން ގާނޫނު ފާސް ކުރީ ކުރިން މަތީ ކޯޓަކުން ޔަހޫދީންނަށް ބަދަލު ދިނުމަށް މުއްދަތެއް ކަނޑައެޅިފައި އޮންނަން ވާނެ ކަމަށް ޙުކުމު ކުރުމުން އެކަމަށް ތަބާވުމުގެ ގޮތުންނެވެ. އަދި ޔަހޫދީންނާ ދެކޮޅަށް ނާޒީން ޕޮލެންޑްގައި ހިންގާފައިވާ ޖަރީމާތަކަކީ ޕޮލެންޑް ހިފައިގެން އުޅުނު ނާޒީ ޖަރުމަނުން ހިންގި އަނިޔާވެރި އަމަލުތަކެއް ކަމުން އެކަމަށް އެންމެ ލޯ ލާރިއެއްވެސް ޕޮލެންޑުގެ ޚަޒާނާއިން ބަދަލުގެ ގޮތުގައި ނުލިބޭނެ ކަމަށެވެ.
މީގެ ކުރިން ޕޮލެންޑުން ވަނީ ޔަހޫދީން ނައްތާލުމުގައި ޕޮލެންޑު މީހުން ބައިވެރިވި ކަމަށް ބުނާ މީހުން ތިން އަހަރަށް ޖަލަށް ލާންވެސް ގާނޫނެއް ފާސް ކޮށްފައެވެ. ފަހުން އިޒްރޭލުން އަޑުގަދަ ކުރުމުން މި ގާނޫނު އަނބުރައި ގެންދިޔައީ އެވެ. އަދި އެއަށްފަހު، ޕޮލެންޑްގެ ބޮޑު ވަޒިރު އިޒްރޭލަށް ވަޑައިގަތުމަށް ހަމަޖެހިފައި ވަނިކޮށް ނަތަންޔާހޫ، ޕޮލެންޑު މީހުން، ނާޒީ ހޮލޮކޯސްޓްގައި ބައިވެރިވި ކަމަށް ބުނުމުން އެ ދަތުރުފުޅު ކެންސަލް ކުރެއްވިއެވެ.
މި ޒުވާބުގެ ތެރޭގައި ޔަހޫދީއަކު ޓެލްއަވީވްގައި ހުންނަވާ ޕޮލެންޑްގެ އެމްބެސެޑަރުގެ މޫނަށް ކުޅެއްވެސް ޖެއްސެވެ. އެމީހާ ހައްޔަރުކޮށް އިޒްރޭލުން އޭނާ ޙުކުމް ކޮށް ޖަލަށް ލިއެވެ.
ޕޮލެންޑްގެ ސަރުކާރަކީ ކަނާތު ފިޔައިގެ، ޔަހޫދީންނަށް މާބޮޑު ހަމްދަރްދީއެއް ނޯންނަ އިސްލާމޯފޯބިއާއަށް ތާއީދުކުރާ މުސްލިމުންނާ ދެކޮޅުވެރި ސަރުކާރެކެވެ.
