އެމެރިކާ ސިފައިން އަފްޣާނިސްތާނުން ފައިބައިގެން ދިޔައަސް އަފްޣާނިސްތާންގައި އޮންނަން ޖެހޭނީ ޑިމޮކްރެޓިކް ސަރުކާރެއް ކަމަށް އެމެރިކާގައި ދިރިއުޅޭ އަފްޣާނިސްތާން މީހުން ބުނެއެވެ. މި ކަމަށް ގޮވާލައި އެތައް ބަޔަކު ވަނީ ވައިޓްހައުސް ކުރިމަތީގައި ބޯޑް ހިފައިގެން ތިބެ ހިމޭން އިހުތިޖާޖެއް ބާއްވާފައެވެ. މި މީހުން އެދިފައި ވަނީ ޕާކިސްތާނުން ތާލިބާނަށް ދޭ އެހީތައްވެސް ކަނޑާލުމަށެވެ.
ޕާކިސްތާނުން ބުނެފައި ވަނީ އަފްޣާނިސްތާން ސަރުކާރު، ތާލިބާންގެ އަތްދަށަށް ގޮސްފިނަމަ ޕާކިސްތާނުން އަފްޣާނިސްތާނަށް ވަދެވެން ހުރި ސަރަހައްދީ ހުރިހައި ދިމާލެއް ބަންދުކޮށްލާނެ ކަމަށެވެ.
ތާލިބާނުން ދަނީ އަފްޣާނިސްތާން ސަރުކާރާ ދެކޮޅަށް ހަމަލަތައް އިތުރު ކުރަމުންނެވެ. ހަފްތާ ނިމުނު އިރު ކާބުލްއާއި ކައިރި ސަރަހަހއްދުތަކަކުން ތާލިބާނުން ވަނީ ކަރަންޓްވެސް ކަނޑާލާފައެވެ.
ވައިޓްހައުސް ކުރިމަތީ އިހުތިޖާޖް ކުރި މީހުން ބުނަނީ، ތާލިބާނަށް ޕާކިސްތާނުން ވާގިވެރިވާ ކަމަށެވެ. އަދި ޕާކިސްތާނުން ތާލިބާން މެދުވެރިކޮށް އަފްޣާނިސްތާންގައި ހިންގަމުން ގެންދަނީ ދުރުން ކުރާ ޕްރޮކްސީ ހަނގުރާމައެއް ކަމަށެވެ. އަދި މިކަމުގެ މަގްސަދަކީ ސަރަހައްދު ހަލަބޮލި ކޮށްލުން ކަމަށެވެ.
