ފުވައްމުލައް ސިޓީގެ ދެ ސްކޫލެއްގައި އިތުރު އިމާރާތެއް އެޅުމަށް އިނޯކާ ޕްރައިވެޓް ލިމިޓެޑާ ޙަވާލު ކޮށްފި އެވެ.
މި މަސައްކަތް އެ ކުންފުންޏާ ހަވާޅުކޮށްފައިވަނީ އެޑިއުކޭޝަން މިނިސްޓްރީގައި ބޭއްވި ރަސްމިއްޔާތެއްގަ އެވެ.
މި ރަސްމިއްޔާތުގައި މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ ސްޓޭޓް މިނިސްޓަރު އަހުމަދު ރިޔާޒެވެ. އިނޯކާ ޕްރައިވެޓް ލިމިޓެޑް ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު ހަސަން ޝަމީމެވެ.
މުހައްމަދު ޖަމާލުއްދީން ސްކޫލްގައި 16 ކްލާސްރޫމް އަދި ކޮމްޕިއުޓަރ ލެބް އިމާރާތުގެ މަސައްކަތް ކުރުމަށް ހަވާލުކޮށްފައިވަނީ 12 މިލިއަން ރުފިޔާ އަށެވެ. އަދި ފުވައްމުލަކު ސްކޫލްގެ މަލްޓި ޕަރޕަސް ހޯލް އިމާރާތުގެ މަސައްކަތް ހަވާލުކުރީ އަށްމިލިއަން ރުފިޔާ އަށެވެ.
އިނާކޯ އިން ބުނީ މުހައްމަދު ޖަމާލުއްދީން ސްކޫލްގައި ކުރިޔަށް ގެންދާ މަޝްރޫއު 365 ދުވަސް ތެރޭގައި ނިންމާނެ ކަމަށެވެ. އަދި ފުވައްމުލަކު ސްކޫލްގައި ކުރިޔަށް ގެންދާ މަޝްރޫއު 330 ދުވަސް ތެރޭގައި ނިންމާލެވޭނެ ކަމަށެވެ.
މިއީ 2021 ގެ ޕީއެސްއައިޕީގެ ދަށުން ކުރިއަށް ގެންދާ މަޝްރޫއުތައް ކަމަށެވެ.
