ޕާކިސްތާންގެ ސިންދް ހައި ކޯޓުން ޓިކްޓިކް މަނާ ކުރުމަށް ޕާކިސްތާން ސަރުކާރަށް އަންގައިފިއެވެ. މިއަދު ސިންދް ހައިކޯޓުން ކުރި ޙުކުމެއްގައި ޕާކިސްތާން ޓެލެކޮމް އޮތޯރިޓީއަށް އަންގާފައި ވަނީ ޓިކްޓޮކްގައި ހިމެނޭ ބަރަހަނާ މާއްދާތައް ބްލޮކް ކުރުމަށެވެ. އަދި މިކަމާ ގުޅޭ ގޮތުން ޕާކިސްތާންގެ ބަންޑާރަ ނާއިބްގެ އޮފީހުންނާއި ޓެލެކޮމް އޮތޯރިޓީން އަޅާ ފިޔަވަޅެއްގެ މަޢްލޫމާތު ދިހަ ދުވަސް ތެރޭގައި ދިނުމަށްވެސް ހައިކޯޓުން ވަނީ އަންގާފައެވެ.
ޕީޝާވަރު ހައިކޯޓުންވެސް ވަނީ މިދިޔަ މާޗް މަހު މިފަދަ ޙުކުމެއް ޓިކްޓޮކްއާ ދެކޮޅަށް ކޮށްފައެވެ. އެ ޙުކުމަކީވެސް ޓިކްޓޮކްގައި ބަރަހަނާ މާއްދާތައް ހުރެގެން ކޮށްފައިވާ ޙުކުމެކެވެ.
މި މައްސަލައަށްފަހު ހައި ކޯޓަށް މަޢްލޫމާތު ދެމުން ޕާކިސްތާން ޓެލެކޮމް އޮތޯރިޓީން ބުނެފައި ވަނީ، 720ހާސް އެކައުންޓެއް ބަންދު ކޮށް، 9.8 މިލިއަން ވީޑިއޯ ޑިލީޓް ކޮށްފައި ވާނެ ކަމަށެވެ. އަދި މިފިޔަވަޅު އެޅުމުގެ ތެރޭގައި ޕާކިސްތާނުން އެތައް ގައުމަކާ ގުޅިގެން މަސައްކަތް ކޮށްފައިވާ ކަމަށްވެސް ޕޭޝާވަރު ހައި ކޯޓަށް މަޢްލޫމާތު ދީފައި ވެއެވެ.
ޕީޝާވަރު ހައިކޯޓުގެ ޗީފް ޖަސްޓިސް ޤައިސަރު ރާޝިދު ޚާން ވިދާޅުވީ، ޓިކްޓޮކް އެއްކޮށް މަނާ ކޮށްލަން ބޭނުން ނުވާ ކަމަށެވެ.
